Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 416 Hüküm no: 488 Orijinal metin no: [78(2)b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah üzerine çocukları için nafaka takdir edilmesi Nafaka Mahmiye-i İstanbul’da Hoşkadem mahallesinde sâkine bâ‘isetü’l-kitâb Fâtıma bt. Abdullah nâm hâtun meclis-i şer‘-i şerîf-i enverde ve mahfil-i dîn-i münîf-i ezherde takrîr-i kelâm ve ta‘bîr ani’l-merâm edip zevcim gāib ani’l-meclis Mehmed b. Abdullah nâm kimesnenin firâşından hâsıl ve benden mütevellid olup bi hakki’l-hidâne hucr ve terbiyyemde olan Ahmed ve Hatice nâm sagīrlerin nafaka ve kisve ve sâir levâzımesiyçün babaları mezbûr Mehmed üzerine kadr-i ma‘rûf akçe farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûba-lehü ve hüsnü me’âb- hazretleri dahi sagīrân-ı mezbûrânın nafaka ve kisve ve sâir levâzım-ı mühimmesiyçün mezbûr Mehmed üzerine her biri için yevmî altışar akçe olmak üzre târih-i kitâbdan on ikişer akçe farz ve takdîr edip meblağ-ı mefrûz-ı mezbûru sagīrân-ı mezbûrâna harc ve sarfa ve lede’l-iktizâ istidâneye ve inde’z-zafer gāib-i mezbûr Mehmed üzerine rücû‘a mezbûre Fâtıma’ya izin verilmeğin mâ vaka‘a bi’t-taleb ketb olundu. Fi’l-yevmi’l-hâmis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mahmud Çelebi b. Hasan, Ali Çelebi b. Bâli, Mehmed Çelebi b. Abdi, İbrahim Çelebi b. Ahmed.