Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 416 Hüküm no: 489 Orijinal metin no: [78(2)b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Abdullah Çelebi’nin Hacı Osman Ağa b. Mehmed’e olan borcunu vârislerine ödediği Sulh Mahmiye-i İstanbul’da Soğanağa mahallesi sükkânından olup hacc-ı şerîfden gelirken medîne-i Şâm-ı şerîf’de bundan akdem vefât eden el-Hâc Osman Ağa b. Mehmed’in verâseti zevce-i metrûkesi Ayşe Hâtun bt. Yusuf ile sulbî kebîr oğulları el-Hâc Abdullah Çelebi ve el-Hâc Hüseyin ve İsmail Çelebi ve Ebûbekir Çelebi’ye ve sulbiye kebîre kızı Râbia’ya münhasıra olduğu şer‘an zâhir ve müte‘ayyin oldukdan sonra mezbûrân İsmail Çelebi ve Ebûbekir Çelebi asâleten ve kendi tarafından asîl ve merkūme Ayşe tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Abdullah Çelebi b. Bayram ve merkūm İsmail Çelebi şehâdetleriyle şer‘an sâbit olan merhûm el-Hâc Hüseyin Çelebi meclis-i şer‘-i şerîf-i enverde işbu bâ‘isü’l-kitâb mezbûr el-Hâc Abdullah Çelebi mahzarında her biri asâleten ve kefâleten ikrâr-ı tâm ve takrîr-i kelâm edip müteveffâ-yı mezbûr el-Hâc Osman’ın merkūm el-Hâc Abdullah Çelebi zimmetinde yedinden müşterâ ve makbûz beynlerinde ma‘lûm emti‘a-i mütenevvi‘a bahâlarından ba‘de külli’l-hesâb bin guruş hakkı vardır meblağ-ı mezbûru kable’l-ahz fevt olmuşdur deyû meblağ-ı mezbûrdan bize ve müvekkile-i merkūmeye isâbet eden hisse-i şer‘iyyemizi mezbûr el-Hâc Abdullah Çelebi’den taleb ve da‘vâ eylediğimizde beynimizde münâza‘ât-ı kesîre cereyânından sonra muslihûn tavassut edip da‘vâ-yı mezbûremden merkūm Abdullah Çelebi ile bizi an inkâr elli guruş üzerine sulh eylediklerinde biz dahi sulh-i mezbûru kabûl ve bedel-i sulh-i mezbûru yedinden ahz u kabz edip husûs-ı mezbûra ve babamız müteveffâ-yı mezbûrun zimem-i nâsda olan hukūkundan mâ‘adâ cemî‘ terekesinden bize isâbet eden hisse-i şer‘iyyemize müte‘allika âmme-i da‘vâdan her birimiz asâleten ve vekâleten ibrâ-i âmm-ı kātı‘ü’n-nizâ‘la ibrâ iskāt eyledik dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ali Ağa b. Ahmed es-sâ[kin]-i mahalle-i Sarrâc İshak, Ebûbekir b. Hasan, Mustafa Çelebi b. Hasan, İbrahim Bey b. ( ), Ahmed Efendi b. Hasan.