İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 184 Hüküm no: 155 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Avadis, Sahak, Agop ve İstefan’ın değirmen gediğindeki hisselerini Aksabet’e sattıkları Üsküdar’da uncu değirmeni Âsitâne-i aliyye’de vâki‘ uncu tâifesinden kendi nefsinden asıl ve Avanis v. Agik ve Sahak v. Artin ve Agop v. Mıgırdıç nâm zimmîler taraflarından husûs-ı âti’l-beyânda vekîlleri olduğu Uncu Haçuk v. Agop ve diğer Agop v. Hazer nâm zimmîler şehâdetleriyle sâbit olan Avakim v. Nazret nâm zimmî vekâleten ve İstefan v. Avadik nâm zimmî asâleten meclis-i şer‘-i hatîrde medîne-i Üsküdar’da mütemekkine bâ‘isetü’s-sifr şahsını mu‘arrefe Aksabet bt. Asvader nâm Nasrâniyenin yeğeni ve tarafından husûs-ı âti’z-zikrde tasdîka vekîli Uncu Zarak v. Avanis zimmî muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip medîne-i Üsküdar’da vâki‘ Arasta değirmeni denmekle arîf üç horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on iki re’s bârgir ve sâir âlât-ı lâzıme-i ma‘lûmenin on iki sehm i‘tibârıyla iki sehmi Anbarsum zimmînin ve bir sehmi diğer Sahak zimmînin ve üç sehmi âharın ve mâ‘adâ altı sehmi dahi akd-i âti’z-zikrin sudûruna değin bizimle müvekkillerim mesfûrûnun bâ-hüccet-i şer‘iyye yedimizde mülkümüz olmağla gedik-i mezkûrdan biz ve müvekkillerim mersûmûnun ber-minvâl-i muharrer mâlikler olduğumuz hisse-i şâyi‘amızı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müştereklerimizin izinleriyle müvekkile-i mersûmeye dört bin guruşa bi’l-asâle ve bi’l-vekâle bey‘ ü temlîk ve vech-i lâyıkı üzere teslîm eylediğimiz[de] ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr dört bin guruşu bize tamâmen def‘ ü teslîm ve biz dahi yedlerinden bi’l-vekâle ve bi’l-asâle ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d hisse-i mezkûreden bizim ve müvekkillerim mersûmûnun aslâ [30b] ve kat‘â alâka ve medhallerimiz kalmayıp müşteriye-i mersûmenin mülk-i müşterâsı ve hakk-ı sırfı olmuşdur dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 5 M sene 1247 Şuhûdü’l-hâl: Eş-şâhidûnü’s-sâbikūn.