İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 183 Hüküm no: 154 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Nazret’in değirmen gediğindeki hissesini Bogos, Nazret ve İstefan’a sattığı Üsküdar’da ekmekçi değirmeni Kayd ihrâc fî 11 R sene [12]64 Medîne-i Üsküdar’da Kara Davudpaşa mahallesinde mütemekkin ekmekçi tâifesinden Nazret v. Kigork v. Nikegos zimmî tarafından husûs-ı âti’l-beyânda ikrâr ve takrîre vekîl olduğu Agop v. Kazer ve Filibos v. Agop nâm zimmîler şehâdetleriyle sâbit olan Haçuk v. Agop nâm zimmî meclis-i şer‘-i hatîrde tâife-i mersûmeden işbu hâmilü’s-sifr kendi nefsinden asıl ve Bogos ve diğer Nazret veledey Avakim nâm zimmîler taraflarından husûs-ı âti’z-zikrde tasdîka vekîl-i şer‘îleri İstefan v. Avadik nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilim mersûm mârrü’l-beyân Kara Davudpaşa mahallesinde kâin ma‘lûmü’l-hudûd ve’l-müştemilât Kebabçılar fırını denmekle arîf sekiz horoslu bir bâb ekmekçi değirmeni ve ona merbût fırın derûnunda mevcûde beyne’l-esnâf gedik ta‘bîr olunur otuz iki re’s bârgir ve sâir âlât-ı lâzıme-i ma‘lûmenin otuz iki sehm i‘tibârıyla on üç buçuk sehmi asıl ve müvekkilân-ı mersûmûn akd-i âti’z-zikrin sudûruna değin benim bâ-hüccet yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum beş sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile asıl ve müvekkilân-ı mersûmûna beş bin guruşa ale’l-iştirâki’s-seviyy bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr beş bin guruşu bana tamâmen def‘ ü teslîm ve ben dahi yedlerinden tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm hisse-i gedik-i mezkûrda benim aslâ ve kat‘â alâka ve medhalim kalmayıp müşteriyyûn-ı asıl ve müvekkilûn-ı mersûmûnun iştirâken mülk-i müşterâları ve hakk-ı sırfları olmuşdur dedi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 5 M sene 1247 Şuhûdü’l-hâl: Uncular Kethüdâsı Mehmed İzzet Ağa, es-Seyyid Mustafa Ağa b. el-Hâc Ali, es-Seyyid Mehmed Aşir Ağa b. es-Seyyid Mehmed Haşim, Yazıcı Ali Efendi b. Memiş.