İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 185 Hüküm no: 157 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal İstavri’nin bakkal dükkânı gediğindeki hissesini hanımı Praşkoviye ve kızı Sofya’ya sattığı Bakkāl Nüshateyn Âsitâne-i aliyye’de vâki‘ bakkāl tâifesinden İstavri v. İstirati nâm zimmî meclis-i şer‘-i hatîrde mersûm İstavri zimmînin hâlâ zevcesi ve sulbiye kebîre kızı işbu hâmileteyü’s-sifr şahısları mu‘arrefe Praşkoviye bt. diğer İstavri ve Sofya nâm Nasrâniyeler taraflarından husûs-ı âti’z-zikrde tasdîka vekîl-i şer‘îleri Bakkāl Tagokodos v. Sotiri nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Sofular nezdinde kâin Hacı Süleyman dükkânı denmekle arîf bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla doksan sehmi Yakof zimmînin ve mâ‘adâ otuz sehmi akd-i âti’z-zikrin sudûruna değin benim bâ-hüccet-i şer‘iyye yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum otuz sehm hissemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşterekim izniyle zevcem ve kızım müvekkilân-ı mersûmetâna iki bin iki yüz guruşa ale’l-iştirâki’s-seviyy bey‘ ü temlîk <> ve vech-i lâyıkı üzere teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl semen-i mezkûr iki bin iki yüz guruşu bana tamâmen def‘ ü teslîm ve ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d hisse-i gedik-i mezkûrda benim aslâ ve kat‘â alâka ve medhalim kalmayıp zevcem ve kızım müşteriyân-ı müvekkilân-ı mesfûrânın mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 5 M sene 1247 Şuhûdü’l-hâl: Eş-şâhidûnü’s-sâbikūn.