İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 186 Hüküm no: 158 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Giridli Nikola’nın tütün dükkânı gediğinin yarısını Tütüncü Yani’ye sattığı Tütüncü Mahmiye-i İstanbul’da Samatya kurbünde Mirahur mahallesinde mütemekkin tütüncü esnâfından Giridî Nikola v. Manol nâm zimmî meclis-i şer‘-i hatîrde esnâf-ı mersûmeden işbu hâmilü’r-rakīm Giridî Yani v. Menasti nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Duhân gümrüğü civârında at hamalları köşesi başında kâin bir bâb tütüncü dükkânı derûnunda mevcûde Ma‘den kaleminde Gabrovalı Topal Yorgi v. Dimitri zimmî ismine mukayyed ve mu‘teber beyne’l-hıref gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iyye müstakıllen yedimde mülküm olmağla ben ber-minvâl-i muharrer mâlik olduğum gedik-i mezkûrun nısf hissesini yedimde ibkā ve diğer nısf hissemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Yani zimmîye üç bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr üç bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fîmâ-ba‘d nısf hisse-i gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Yani zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 14 M sene 1247 Şuhûdü’l-hâl: Kethüdâ Mustafa Kâşif Ağa, Vekîli es-Seyyid Mehmed Ağa, Alâiyeli el-Hâc Mustafa Ağa, Yiğitbaşı Hafız Ahmed Ağa, Köşe ustası Mehmed Emin Efendi.