İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 188 Hüküm no: 160 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasilaki ve Zoviçe’nin uhdelerindeki kuyumcu gediğine ait hisseleri kardeşlerine sattıkları Vezneciler’de kuyumcu Medîne-i Üsküdar’a tâbi‘ Büyükbakkāllar karyesinde mütemekkineler Vasilaki ve Zoviçe bintey Kuyumcu Dimitri v. Yorgi nâm Nasrâniyelerden mersûme Zoviçe Nasrâniyenin zevci ve taraflarından husûs-ı âti’l-beyânda vekîlleri olduğu şahıslarını bilir Bakkāl Yani v. Kosta ve Bağcı Dimitri v. Rayka nâm zimmîler şehâdetleriyle sâbit olan Tütüncü Todori v. Zaharya nâm zimmî meclis-i şer‘-i hatîrde müvekkiletân-ı mersûmâtın li-ebeveyn er karındaşları işbu hâmilü’r-rakīm Yorgi [v.] Ananosti nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Vezneciler kurbünde sebîl ittisâlinde kâin ma‘lûmü’l-hudûd bir bâb ve karşısında vâki‘ kezâlik ma‘lûmü’l-hudûd bir bâb ki cem‘an iki bâb kuyumcu dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin seksener sehm i‘tibârıyla altmış altışar sehmi mersûm Yorgi Ananosti zimmînin ve yedişer sehmden on dört sehmi akd-i âti’z-zikrin sudûruna değin zevcem ve müvekkilelerim mesfûretânın yedlerinde ırsen mülkleri olmağla gedik-i mezkûrdan zevcem ve müvekkilelerim mersûmâtın ber-minvâl-i muharrer mâlike oldukları hisse-i şâyi‘alarını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile karındaşları mersûm Yorgi Ananosti zimmîye iki yüz on sekiz guruş otuz paraya bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr iki yüz on sekiz guruş otuz parayı bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt eyledik fî-mâ ba‘d gedik-i mezkûrların hisse-i şâyi‘alarında zevcem ve müvekkilelerim mesfûretânın aslâ ve kat‘â alâka ve medhalleri kalmayıp mecmû‘u gedik-i mezkûrlar karındaşları müşteri-i mersûm Yorgi Ananosti zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 17 M sene 1247 Şuhûdü’l-hâl: Kethüdâ-i muhzırân İsmail Ağa, Odacı Hüseyin Çelebi. Ustabaşı Vasil, Ustabaşı İsak, Ustabaşı Kiryako.