İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 187 Hüküm no: 159 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un berber gediğindeki hissesini Berber Mehmed Salih Ağa’ya sattığı Berber Mahmiye-i İstanbul’da Aksaray kurbünde Çakır Ağa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Hadice bt. İbrahim nâm hatun meclis-i şer‘-i münîrde berber esnâfından işbu bâ‘isü’l-kitâb Mehmed Salih Ağa b. Mustafa mahzarında ikrâr-ı tâm ve takrîr-i kelâm edip mahmiye-i mezbûrede Sultan Bayezid-i Velî Câmi‘-i şerîfi avlusunda Hancı Ali Ağa ve diğer Hadice Hatun’un berber dükkânları beynlerinde kâin şehriye beş guruş kirâ-i kadîmeli bir bâb berber dükkânı derûnunda mevcûde Başmuhâsebe kaleminde Abdi Usta ismine mukayyed beyne’l-esnâf gedik ta‘bîr olunur âlât-ı lâzıme-i ma‘lûmenin nısfı sadrî kebîr oğlum işbu hâzır bi’l-meclis Berber es-Seyyid Hüseyin b. [31a] Ömer’in ve nısf-ı âharı dahi akd-i âti’z-zikrin sudûruna değin benim bâ-hüccet-i şer‘iyye yedimizde iştirâken mülkümüz olmağla gedik-i mezkûrdan ben ber-minvâl-i muharrer mâlike olduğum nısf hisse-i şâyi‘amı tarafeynden îcâb ve kabûlü hâvî şürût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ve oğlum ve müşterekim hâzır-ı mezbûrun izn ü icâzetiyle merkūm Mehmed Salih Ağa’ya dört bin beş yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr dört bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i sahîh-i şer‘î ile ibrâ ve iskāt eyledik fîmâ-ba‘d nısf gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Mehmed Salih Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu. Fî 15 M sene 1247 Şuhûdü’l-hâl: Kethüdâ vekîli el-Hâc İbrahim Ağa, Şeyh Mustafa Efendi, Du‘âcı İsmail Efendi, Yiğitbaşı es-Seyyid Mehmed Nuri Ağa, Çavuş es-Seyyid Mehmed Nuri Ağa.