İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 279 Hüküm no: 267 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marbuççu Ali Ağa’nın aşçı ve kebabcı dükkânındaki gedik hissesini kardeşi Sabuncu Mehmed Ağa’ya sattığı Aşçı ve kebabcı mübâya‘ası Mahmiye-i İstanbul’da Küçükpazar kurbünde Hoca Hayreddin mahallesinde sâkin Marpuççu Ali Ağa b. Hüseyin meclis-i şer‘-i münîrde li-ebeveyn er karındaşı işbu bâ‘isü’l-kitâb Sabuncu Mehmed Ağa mahzarında ikrâr-ı tâm ve takrîr-i kelâm edip mahmiye-i mezbûrede Kantarcılar sûku nezdinde köşebaşında simitçi fırını ittisâlinde kâin şehriye beş buçuk guruş kirâ-i kadîmeli bir bâb aşçı ve hoşâbçı ve kebabcı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Aşçı Ahmed ve otuz sehmi Aşçı Hüseyin ve otuz sehmi Aşçı Mehmed nâm kimesnelerin ve yirmi sehmi karındaşım mezbûr Mehmed Ağa’nın ve on sehmi dahi akd-i âti’z-zikrin sudûruna değin benim yedimizde mülkümüz olmağla ben gedik-i mezkûrdan ber-minvâl-i muharrer mâlik olduğum on sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ karındaşım merkūm Mehmed Ağa’ya dört yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr dört yüz guruşu karındaşım müşteri-i merkūm bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt <> fîmâ-ba‘d gedik-i mezkûrun on sehm hisse-i şâyi‘asında benim aslâ ve kat‘â alâka ve medhalim kalmayıp gedik-i mezkûrun yirmi sehmi mukaddemâ ve on sehmi hâlâ ki cem‘an otuz sehm hisse-i şâyi‘ası karındaşım müşteri-i merkūm Mehmed Ağa’nın mülk-i mahz ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 18 Şevvâl [sene 1247] Şuhûdü’l-hâl: Yiğitbaşı es-Seyyid Mehmed Ağa, Mütevellî Mehmed Emin Ağa, Yazıcı İsmail Naili Efendi, Kethüdâ es-Seyyid Ali Ağa