İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 276 Hüküm no: 266 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsam Bey Vakfı’ndan iki ev ve bir kireçhanenin Bakkal Petro’ya ait iki ev ile istibdâl edildiği İstibdâl İşbu kitâb-ı sıhhat-nisâbın tahrîr ve imlâ ve tastîr ve inşâsına bâ‘is ü bâdî oldur ki Dârü’l-hilâfeti’l-aliyye Kostantıniyyeti’l-mahmiye kādıları fazîletlü efendiler hazerâtı nezâretlerinde olan evkāfdan mahmiye-i mahkiyyede Kırkçeşme kurbünde Hüsam Bey nâm sâhibü’l-hayrın mescid-i şerîfi ve mekteb-i münîfi vakfının mütevellîsi es-Seyyid Hüseyin Hüsnü Efendi b. el-merhûm el-Hâc Hasan Efendi tarafından zikri âtî menâzilin ibdâl ve istibdâlini muhâkemeye vekîl müseccel-i şer‘îsi es-Seyyid Hafız Mehmed Efendi b. es-Seyyid Mustafa meclis-i şer‘-i şerîf-i enverde bakkāl tâifesinden Petro v. Kostandi nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i mezbûrede Topkapı kurbünde Fâtıma Sultan mahallesinde vâki‘ müvekkilim mezbûr es-Seyyid Hüseyin Hüsnü Efendi’nin mütevellîsi olduğu merhûm-ı mezbûr Hüsam Bey Vakfı musakkafâtından şehriye on dört akçe icâre-i müecceleli bir tarafdan vakf-ı mezbûrdan menzil ve tarafeyni Ayanikola kilisesi bahçesi ve taraf-ı râbi‘i tarîk-i âm ile mahdûd hulefâ-i müdîr-i ebniye-i hâssadan es-Seyyid Mehmed Nuri ve Mehmed Esad halîfelerin mahallerinde misâhalarıyla terbî‘an iki yüz altmış bir zirâ‘ arsa üzerinde mebnî fevkānî üç bâb oda ve bir sofa ve tahtânî bir bi’r-i mâ ve havlu ve bir mikdâr bahçe ve sokak kapısını müştemil bir bâb ve ittisâlinde kâin şehriye elli akçe icâre-i müecceleli bir tarafdan menzil-i mezkûr ve bir tarafdan vakf-ı mezbûrdan kireçhâne ve bir tarafdan nefs-i kilise-i mezkûr ve taraf-ı râbi‘i tarîk-i âm ile mahdûd terbî‘an iki yüz kırk sekiz zirâ‘ arsa üzerinde mebnî fevkānî iki bâb oda ve bir sofa ve tahtânî bir mikdâr havlu ve bahçe ve sokak kapısını müştemil bir bâb ki cem‘an iki bâb menzil ile ittisâlinde vâki‘ kezâlik şehriye elli akçe icâre-i müecceleli bir tarafından menzil-i mezkûr ve bir tarafdan kilise-i merkūm bahçesi ve tarafeyni tarîk-i âm ile mahdûd terbî‘an iki yüz on iki buçuk zirâ‘ arsa üzerine mebnî kiremit sakflı bir sundurma ve bir bi’r-i mâ ve havlu ve sokak kapısını müştemil bir bâb kireçhâneyi mersûm Petro zimmînin mahalle-i mezbûre civârında Bayezidağa mahallesinde kâin bir tarafdan ba‘zen Attâr Kirkor zimmî menzili ve ba‘zen Hamal Yiğithan demekle meşhûr Ohan zimmî menzili bahçesi ve verâsı ba‘zen Kaldırımcılar odaları ve ba‘zen Keresteci Kirkor zimmî menzili bahçesi ve ba‘zen Eski Şerbethâne bahçesi ve taraf-ı râbi‘i tarîk-i âm ile mahdûd fi’l-asl sekiz yüz otuz sekiz zirâ‘ arsa üzerinde bir bâb menzil olup el-yevm mersûmân Attâr Kirkor zimmî menzili ve Hamal Ohan zimmî bahçesi ve Kaldırımcılar odalarıyla ba‘zen mesfûr Keresteci Kirkor zimmî bahçesi taraflarında vâki‘ terbî‘an dört yüz yedi buçuk zirâ‘ arsa-i müfreze üzerinde mebnî fevkānî dört bâb oda ve bir sofa ve tahtânî bir matbah ocağı ve bi’r-i mâ ve bir memşâ ve bir kârgir zîr-i zemîn mahzen ve havlu ve bahçe ve sokak kapısını müştemil bir bâb ve mersûmûn Tütüncü Mıgırdıç zimmî menzili ve Papa Matos ile Kadsi Nasrâniye ve şerbethâne bahçeleriyle ba‘zen mesfûr Keresteci Kirkor zimmî menzili bahçesi taraflarında kâin terbî‘an dört yüz otuz buçuk zirâ‘ arsa-i müfreze üzerinde mebnî fevkānî üç bâb oda ve sofa ve tahtânî bir matbah ocağı ve bi’r-i mâ ve bir memşâ ve havlu ve bahçe ve sokak kapısını müştemil bir bâb ki cem‘an iki bâb mülk menzilleriyle müvekkilim mezbûr es-Seyyid Hüseyin Hüsnü Efendi istibdâle tâlib ve râgıb ve bundan akdem sâdır olan fermân-ı âlî-şâna imtisâlen cânib-i şer‘-i kaviyyü’l-esâsdan ta‘yîn olunan başkâtib eşrâf-ı kuzâtdan Mevlânâ İbrahim Ârif Efendi ve hulefâ-i mezbûrân ile evvelen vakıf olan mârrü’l-beyân Fâtıma Sultan mahallesinde vâki‘ iki bâb menzil ve bir bâb kireçhâne üzerine varılıp müvekkilim mütevellî-i mezbûr es-Seyyid Hüseyin Hüsnü Efendi ile mersûm Petro zimmî muvâcehelerinde hulefâ-i mezbûrân ve sâir ehl-i vukūf keşf ü misâha ve tahmîn ve takvîm eylediklerinde mecmû‘unun arsa-i merkūmeleri yedi yüz yirmi bir buçuk zirâ‘ olup beher zirâ‘ı beşer guruşdan üç bin altı yüz yedi buçuk guruş ve menzil-i evvel üzerinde kâin terbî‘an yüz otuz buçuk zirâ‘ ahşab ebniyesi beher zirâ‘ı yirmişer guruşdan iki bin altı yüz on guruş ve ittisâlinde vâki‘ kireçhâneye muttasıl olan menzil-i sânî üzerinde vâki‘ terbî‘an yüz on buçuk zirâ‘ harâb ahşab ebniyesi beher zirâ‘ı on üçer guruşdan bin dört yüz otuz altı buçuk guruş ve ittisâlinde olan kireçhâne üzerinde kâin terbî‘an iki yüz on iki buçuk zirâ‘ ahşab sundurma beher zirâ‘ı onar guruşdan iki bin yüz yirmi beş guruş ki min-haysü’l-mecmû‘ arsa ve ebniyelerinin kıymetleri dokuz bin yedi yüz yetmiş dokuz guruşa bâliğ oldukdan sonra sâniyen cümle ile mersûm Petro zimmînin mülkü olan mârru’z-zikr Bayezidağa mahallesinde kâin menzileyn-i memlûkeyn-i mezkûreyn üzerine varılıp kezâlik keşf ü misâha ve tahmîn ü takvîm eylediklerinde menzileyn-i memlûkeyn-i mezkûreynin arsa-i merkūmeleri sekiz yüz otuz sekiz zirâ‘ olmağla beher zirâ‘ı sekizer guruşdan altı bin yedi yüz dört guruş mersûmân Attâr Kirkor zimmî menzili ve Hamal Ohan zimmî bahçesi ve Kaldırımcılar odalarıyla ba‘zen mesfûr Keresteci Kirkor zimmî menzili bahçesi taraflarında kâin terbî‘an dört yüz yedi buçuk zirâ‘ arsalı müfrez menzil-i mezbûrun üzerinde ahşab ebniye-i mezkûresi terbî‘an yüz kırk dört zirâ‘ dokuz parmak olup beher zirâ‘ı yirmi beşer guruşdan üç bin altı yüz yirmi guruş ve terbî‘an kırk dört zirâ‘ mahzen beher zirâ‘ı otuzar guruşdan bin üç yüz yirmi guruş ve ittisâlinde olan mersûmûn Tütüncü Mıgırdıç zimmî menzili ve Papa Matos ile Kadsi Nasrâniye ve şerbethâne bahçeleriyle ba‘zen mesfûr Keresteci Kirkor zimmî menzili bahçesi taraflarında kâin terbî‘an dört yüz otuz buçuk zirâ‘ arsalı müfrez menzil-i mezkûrun üzerinde ahşab ebniye-i mezkûresi terbî‘an bin altı yüz iki buçuk zirâ‘ olup beher zirâ‘ı kezâlik yirmi beşer guruşdan dört bin <> altmış iki buçuk guruş ki min-haysü’l-mecmû‘ ve ebniyelerinin kıymetleri on beş bin yedi yüz altmış buçuk guruşa bâliğ olup beherinin şehriye yetmiş beşer akçeden ikisinin cem‘an yüz elli akçe icâre-i müecceleye dahi tahammülü olduğu bi’l-ihbâr lede’ş-şer‘i’l-enver zâhir olmağla ol vechile menzileyn-i memlûkeyn-i mezkûreyn vakıf olan iki bâb menzil ve bir bâb kireçhâneden vüs‘at ve kıymet ve rağbet ve ücret ve şeref cihetleriyle evfer ve ekser olup şürût-ı istibdâl mevcûde ve vakıf olan iki bâb menzil ve bir bâb kireçhâne menzileyn-i memlûkeyn-i mezkûreyn ile istibdâl olunmak cânib-i vakfa evlâ ve enfâ‘ ve hayr-ı mahz olduğunu hulefâ-i mezbûrân ve sâir ehl-i vukūf [50a] Müslimîn ihbâr eylediklerini ba‘de’l-inhâ pâye-i serîr-i a‘lâya i‘lâm olundukda ber-vech-i muharrer istibdâle izni müş‘ir bâlâsı tuğrâ-yı garrâ-yı cihân-dârî ile mu‘anven müvekkilim mütevellî-i mezbûr yedine işbu meclis-i şer‘de ibrâz eylediğim emr-i âlî-şân ihsân olunmağla ben dahi binâen-aleyh bundan akdem bi’l-vekâle vakıf olan sâlifü’z-zikr iki bâb menzil ve bir bâb kireçhâneyi ber-mûceb-i emr-i âlî ve bâ-izn-i hâkimü’ş-şer‘ menzileyn-i memlûkeyn-i merkūmeyn ile istibdâl ve sâlifü’l-beyân iki bâb menzil ve bir bâb kireçhâneyi mülk olmak üzere mahâllinde mersûm Petro zimmîye teslîm ol dahi ba‘de’l-kabz mülk olan menzileyn-i mezkûreyni vakıf olmak üzere müvekkilim mütevellî-i mezbûr için bana teslîm eyledi dedikde gıbbe’t-tasdîki’ş-şer‘î vekîl-i mezbûr es-Seyyid Hafız Mehmed Efendi istibdâl-i mezkûrdan bi’l-vekâle rücû‘ ile sâlifü’l-beyân iki bâb menzil ve bir bâb kireçhâneyi kemâ-fi’l-evvel vakıf olmak üzere istirdâd ve mersûm Petro zimmî dahi teslîmden imtinâ‘ ile kemâ-hüve’l-mastûr fi’l-kütübi’l-fıkhiyye hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri huzûrunda müterâfi‘ân ve her biri fasl ve hasma tâlibân olduklarında hâkim-i mûmâ-ileyh -esbağallâhu ni‘amehû aleyh- hazretleri mukaddemâ vakıf olan iki bâb menzil ve bir bâb kireçhânenin şürût-ı bedeli verilip vakıf olan menzileyn-i mezkûreynde cereyân etmek üzere istibdâl-i mezkûrun evvelen sıhhat ve cevâzına ve sâniyen lüzûmuna alâ-kavli men-yerâhu mine’l-eimmeti’l-müctehidîn hükm-i sahîh-i şer‘î ve kazâ-i sarîh-i mer‘î buyurup fîmâ-ba‘d mârru’z-zikr vakıf olan iki bâb menzil ve bir bâb kireçhâne mülk ve menzileyn-i memlûkeyn-i mezkûreyn vakıf olup nakz ve nakīzine mecâl muhâl oldu cerâ zâlike ve hurrire fi’l-yevmi’l-hâmis ve’l-ışrîn min-Cumâdelâhire li-sene seb‘a ve erba‘în ve mi’eteyn ve elf. Şuhûdü’l-hâl: Eşrâf-ı kuzâtdan Ahmed Hamid Efendi, Kethüdâ-i muhzırân Hafız İsmail Ağa, Tahtacı Salih Ağa, Muhzır Odacı Arabgirî Molla Hüseyin b. Yusuf, Muhzır Müezzinzâde Molla Halil b. Süleyman ve gayruhum.