İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 280 Hüküm no: 269 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Yorgi’nin tütüncü dükkânı gediğini Hüseyin Efendi’den satın aldığını ispat ettiğinden hüccet verilmesi Tütüncü ihbârı Âsitâne-i aliyye’de vâki‘ duhân tüccârından Marulyalı bâ‘isü’s-sifr Yorgi v. Yani nâm zimmî meclis-i şer‘-i hatîrde takrîr-i kelâm ve bast ani’l-merâm edip mahmiye-i mezbûrede Aksaray çarşısında vâki‘ manav ve haffâf dükkânları beynlerinde kâin şehriye altı guruş kirâ-i kadîmeli bir bâb tütüncü dükkânı derûnunda mevcûde Ma‘den kaleminde el-Hâc Ahmed ismine mukayyed şürût-ı nizâma dâhil beyne’l-esnâf gedik ta‘bîr olunur âlât-ı lâzıme-i ma‘lûme bin iki yüz otuz senesi Zilka‘detü’ş-şerîfesi’nin on yedinci günü es-Seyyid Hüseyin Efendi nâm kimesneden iki bin iki yüz guruş semen-i makbûza yedimde şirâen mülküm olup lâkin gedik-i mezkûr ber-minvâl-i muharrer şirâen mülküm olduğunu nâtık yedimde hüccet-i şer‘iyye olmamağla esnâf-ı mezkûreden husûs-ı mezkûra vâkıf ve muttali‘ olan kimesnelerden istihbâr olunup yedime bir kıt‘a hüccet-i şer‘iyye i‘tâ buyurulmak niyâzımdır dedikde esnâf-ı mezkûreden zeyl-i hüccetde isimleri mezkûr kimesnelerden lede’l-istihbâr fi’l-hakīka zikri sebkat eden dükkân derûnunda mevcûde âlât-ı gedik-i mezkûr târîh-i merkūmda mersûm Yorgi zimmî merkūm es-Seyyid Hüseyin Efendi nâm kimesneden iki bin iki yüz guruş semen-i makbûza iştirâ edip ol vechile mersûm Yorgi zimmînin yedinde mülk-i müşterâsı olduğu ma‘lûmumuzdur deyü her biri alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka ketb ü imlâ olundu. Fî 13 Ra sene 1247 Şuhûdü’l-hâl: Kethüdâ Mustafa Kâşif Ağa, Vekîli es-Seyyid Mehmed Ağa, Alâiyeli el-Hâc Mustafa Ağa, Yiğitbaşı Hafız Ahmed Ağa, Köşe ustası Mehmed Emin Efendi.