İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 281 Hüküm no: 270 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arapgirli Topsakal Mehmed Ağa’nın bakkal gediğini Bezzazistani Mehmed Emin Ağa’ya sattığı Asıl hüccet târîhi fî 13 L sene 1241 Bakkāl Koska’da İşbu sebt-i hâmiş olunan hüccetde ismi mezkûr Dîvân-ı Hümâyûn çavuşlarından Arabgirî Topsakal Mehmed Ağa b. Ömer meclis-i şer‘-i şerîf-i enverde işbu bâ‘isü’l-vesîka Bezzâzistânî Mehmed Emin Ağa b. İbrahim mahzarında ikrâr-ı tâm ve takrîr-i kelâm edip hüccet-i mezkûre derûnunda zikr <> ü beyân kılındığı üzere akd-i âti’z-zikrin sudûruna değin mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mehmed Emin Ağa’ya üç bin beş yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr üç bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Mehmed Emin Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 17 R sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi, Kethüdâ-i muhzırân Hafız İsmail Ağa ve gayruhum.