İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 321 Hüküm no: 296 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın yumurtacı dükkânı gediğini Halil Ağa’ya sattığı Asıl hüccet târîhi fî-selhi M sene [1]247 Yumurtacı İşbu sebt-i hâmiş olunan hüccetde mezkûrü’l-ism es-Seyyid Ahmed Ağa b. Süleyman meclis-i şer‘-i şerîf-i enverde kezâlik derûn-ı hüccet-i merkūmede ismi muharrer bâ‘isü’l-vesîka Halil Ağa b. Mustafa mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin ber-mantûk-ı hüccet mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Halil Ağa’ya bin altı yüz elli guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin altı yüz elli guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Halil Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 4 Ca sene 1247 Şuhûdü’l-hâl: es-Seyyid el-Hâc Osman Ağa b. es-Seyyid Ali, es-Seyyid el-Hâc Halil Ağa b. es-Seyyid el-Hâc Yusuf.