İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 322 Hüküm no: 297 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalaycıoğlu Tütüncü Ahmed Ağa’nın tütüncü dükkânı gediğini Tarsi’ye sattığı Tütüncü Mahrûse-i Galata’ya muzâfe Kasaba-i Tophâne[de] Tomtom mahallesinde sâkin Kalaycıoğlu Tütüncü Ahmed Ağa b. Abdullah meclis-i şer‘-i şerîf-i enverde Tatavla mütemekkinelerinden işbu bâ‘isetü’s-sifr Tarsi bt. Todori nâm Nasrâniye tarafından husûs-ı âtîde tasdîka vekîli tütüncü esnâfından Yazıcı Mihal v. Dimitri nâm zimmî muvâcehesinde ikrâr-ı tâm ve takrîr-i kelâm edip İstanbul’da Ketenciler sûku civârında merhûm Aşir Efendi Kütüphânesi köşesinde Tütüncü Mustafa Ağa mağazası ittisâlinde kâin fevkinde bir bâb odayı müştemil taş direkli şehriye sekiz guruş kirâ-i kadîmeli bir bâb kârgir duhânî mağazası derûnunda mevcûde beyne’l-esnâf gedik ta‘bîr olunur bir peşkûn ve beş billûr kâse ve bir terâzî ma‘a derâhim ve bir kantar ve bir akçe tahtası ve sâir âlât-ı lâzıme-i ma‘lûme akd-i âti’z-zikrin sudûruna değin benim bâ-hüccet-i şer‘iyye müstakıllen yedimde mâlım ve mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mersûme Tarsi Nasrâniyeye altı bin yedi yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr altı bin yedi yüz guruşu müvekkile-i mersûme Tarsi Nasrâniye bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteriye-i müvekkile-i mersûme Tarsi Nasrâniyenin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 8 Ca sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yazıcı es-Seyyid Mehmed Efendi, Yiğitbaşı Hafız Ahmed Ağa, Silivrili Mehmed Ağa.