İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 323 Hüküm no: 299 Orijinal metin no: [58b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Osman Ağa’nın berber dükkânı gediğini Ömer Ağa’ya sattığı Berber Mahmiye-i İstanbul’da Şehremini kurbünde Caferağa mahallesinde sâkin Hafız Osman Ağa b. İsmail nâm kimesne meclis-i şer‘-i münîrde işbu bâ‘isü’l-kitâb Ömer Ağa b. Mustafa nâm kimesne mahzarında ikrâr-ı tâm ve takrîr-i kelâm edip mahmiye-i mezbûrede Odabaşı çarşısında vâki‘ câmi‘-i şerîf kapısı karşısında kâin Başmuhâsebe kaleminde Berber Ahmed Usta ismine mukayyed mukaddemâ bi’l-iktizâ âhar akāra tebdîl olunan bir bâb berber dükkânından müstahlas beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin benim bâ-hüccet-i şer‘iyye yedimde müstakıllen mâlım olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Ömer Ağa’ya bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt <> eyledik ba‘dehu gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Ömer Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 11 Ca sene 1247 Şuhûdü’l-hâl: Eş-şâhidûnü’s-sâbikūn