İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 324 Hüküm no: 300 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın berber dükkânı gediğinin yarı hissesini Ahmed Ağa’ya sattığı Berber Kilid Hanı’nda Mahmiye-i İstanbul’da Şeyh Ebulvefâ kurbünde Voynuk Şücaeddin mahallesinde sâkin Mehmed Ağa b. Süleyman nâm kimesne meclis-i şer‘-i şerîf-i enverde işbu bâ‘isü’l-kitâb es-Seyyid Ahmed Ağa b. es-Seyyid Mustafa mahzarında ikrâr-ı tâm ve takrîr-i kelâm edip mahmiye-i mezbûrede Uzun Çarşı kurbünde vâki‘ Kilid Hanı denmekle arîf han derûnuna hîn-i duhûlde cânib-i yesârda kâin şehriye üç guruş kirâ-i kadîmeli bir bâb berber dükkânı derûnunda mevcûde Başmuhâsebe kaleminde kendi ismime mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-sûret yedimde müstakıllen mâlım ve mülküm olmağla ben ber-minvâl-i muharrer mâlik olduğum gedik-i mezkûrun nısfını yedimde ibkā ve nısf-ı âharını dahi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid Ahmed Ağa’ya beş bin yedi yüz elli guruşa bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip semen-i mezkûr beş bin yedi yüz elli guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d nısf gedik-i mezkûrda benim aslâ ve kat‘â alâka ve medhalim kalmayıp müşteri-i merkūm es-Seyyid Ahmed Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 11 Ca sene 1247 Şuhûdü’l-hâl: Eş-şâhûdûnü’s-sâbikūn