İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 331 Hüküm no: 309 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor zimminin berber dükkânı gediği hissesini Ali Efendi’ye sattığı Berber Mahmiye-i İstanbul’da Şeyh Ebulvefâ Hanı’nda mütemekkin alacacı tâifesinden Tebrizli Kirkor v. Minas nâm zimmî meclis-i şer‘-i hatîrde ricâl-i Devlet-i aliyye’den hâlâ defterdâr-ı şıkk-ı evvel atûfetlü efendi hazretlerinin kethüdâsı işbu bâ‘isü’l-kitâb es-Seyyid Ali Efendi b. Mehmed tarafından husûs-ı âti’l-beyânda tasdîka vekîl-i şer‘îsi es-Seyyid Ömer Ağa b. Hüseyin mahzarında ikrâr-ı tâm ve takrîr-i kelâm edip nezâret-i dâ‘iyânemizde olan evkāfdan merhûm el-Hâc İsmail Ağa Vakfı musakkafâtından mahmiye-i mezbûrede Kumkapı kurbünde Ermeni kilisesi civârında Pazaryeri nâm mahâlde kâin tarafeyni Hazînedâroğlu ve Terzi Kigork zimmî menzilleri beyninde vâki‘ bir bâb berber dükkânı derûnunda mevcûde Başmuhâsebe kaleminde mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûmenin nısfı Kazer nâm zimmînin ve nısf-ı âharı dahi akd-i âti’z-zikrin sudûruna değin benim bâ-hüccet-i şer‘iyye yedimizde iştirâken mülkümüz olmağla gedik-i mezkûrdan ben ber-minvâl-i muharrer mâlik olduğum nısf hisse-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekim mersûmun izniyle müvekkil-i merkūm es-Seyyid Ali Efendi’ye beş bin guruşa bey‘ ü temlîk ve lâyıkı vechile teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr beş bin guruşu müşteri-i müvekkil-i merkūm bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrun nısf hissesinde benim aslâ ve kat‘â alâka ve medhalim kalmayıp müşteri-i müvekkil-i merkūm es-Seyyid Ali Efendi’nin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 23 Ca sene 1247 Şuhûdü’l-hâl: Kethüdâ vekîli el-Hâc İbrahim Ağa, Yazıcı es-Seyyid el-Hâc Abdurrahman Efendi, Şeyh Mustafa Efendi, Du‘âcı İsmail Efendi, Yiğitbaşı el-Hâc Mehmed Nuri Ağa ve gayruhum.