İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 330 Hüküm no: 308 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu Ahmed Ağa’nın dükkân gediğini Üftade Kadın ile kızı Ruveyde Hanım’a sattığı Sabuncu Mahmiye-i İstanbul’da Süleymaniye kurbünde Kâtib Şemseddin mahallesinde sâkin sabuncu esnâfından el-Hâc Ahmed Ağa b. Mustafa nâm kimesne meclis-i şer‘-i şerîf-i enverde mahmiye-i mezbûrede Azebler kurbünde Salihpaşa mahallesinde sâkineler işbu bâ‘iseteyü’l-kitâb zâtları mu‘arrefe Üftade Kadın bt. Abdullah ve sadriye kebîre kızı Ruveyde Hanım’ın babası ve taraflarından husûs-ı âti’l-beyânda tasdîka vekîl-i şer‘îleri hâlâ Sabun Nâzırı el-Hâc Hüseyin Ağa b. Hasan mahzarında ikrâr-ı tâm ve takrîr-i kelâm edip mahmiye-i mahkiyyede Mahmudpaşa çarşısı başında vâki‘ bir kıt‘a sabuncu sergisi derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iyye müstakıllen yedimde mâlım ve mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkiletân-ı mezbûretâna ale’l-iştirâki’s-seviyy iki bin üç yüz guruşa bey‘ ü temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr iki bin üç yüz guruşu bana tamâmen def‘ ü teslîm ve ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm <> ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müvekkiletân-ı mezbûretân Üftade Kadın ve Rüveyde Hanım’ın iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 6 Ca sene 1247 Şuhûdü’l-hâl: Kethüdâ Mehmed Raşid Ağa, es-Seyyid el-Hâc Mustafa Ağa, es-Seyyid Ali Ağa, es-Seyyid el-Hâc Mustafa Ağa, es-Seyyid Hasan Ağa.