İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 334 Hüküm no: 312 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zoviçe Nasraniyenin bakkal gediği hissesi kirasından Bakkal Dimitri’de olan alacağını tahsil edip dükkânı tekrar Dimitri’ye kiraladığı Bakkāl Çatladıkapı Vilâyet-i Rumeli’de Yenişehir-i Fener kazâsına tâbi‘ Rendine karyesinde mütemekkine Zoviçe bt. Yani Nasrâniyenin yeğeni ve tarafından husûs-ı âti’l-beyânda vekîl olduğu şahs-ı mersûmeyi bilir Bakkāl Ananosti v. Hıristo ve Bakkāl Yani v. Yorgi nâm zimmîler şehâdetleriyle sâbit olan Bakkāl Kostandi v. İsteryo nâm zimmî meclis-i şer‘-i hatîrde bakkāl tâifesinden işbu hâmilü’r-rakīm Dimitri v. Menet nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Çatladıkapı dâhilinde kâin Cebeci Mehmed dükkânı denmekle ma‘rûf bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla seksen sehmi gāib ani’l-meclis Bakkāl Yorgi v. Eftat zimmînin ve yirmi sehmi dahi mersûm Dimitri zimmînin ve bâkī yirmi sehmi dahi müvekkilem mersûme Zoviçe Nasrâniyenin bâ-hüccet-i şer‘iyye yedlerinde iştirâken ve şâyi‘an mülkleri olmağla gedik-i mezkûrdan müvekkilem mersûmenin ber-vech-i muharrer mâlike olduğu yirmi sehm hisse-i şâyi‘asında mersûm Dimitri zimmî kirâ-i ma‘lûme kavliyle on dört sene müddet müsteciri olup ve müddet-i mezkûre kirâsından [61a] mersûm Dimitri zimmî zimmetinde terâküm eden mebâliğ-i ma‘lûmeyi mersûm Dimitri zimmî bana tamâmen def‘ ü teslîm ve ben dahi yedinden bi’l-vekâle ahz u kabz etmemle fîmâ-ba‘d hisse-i şayi‘a-i mezkûrenin kirâsından mersûm Dimitri zimmî zimmetinde bir akçe ve bir habbe alacak hakkı kalmamağla ben hisse-i şâyi‘a-i mezkûreyi işbu sene-i mübârekede duhûl edecek rûz-ı hızırdan sinîn beyân etmeksizin senevî yüzer guruş kirâ mukāvelesiyle mersûm Dimitri zimmîye bi’l-vekâle îcâr ve lâyıkı vechile teslîm eylediğimde ol dahi ber-minvâl-i muharrer istîcâr ve tesellüm ve kabûl ve kirâ-i mezkûru sâl be-sâl müvekkilem mersûmeye bilâ-ezâ ve lâ-cefâ edâya ta‘ahhüd eyledi dedikde mukırr-ı vekîl-i mersûm Kostandi zimmînin bi’l-cümle takrîr-i meşrûhunu mersûm Dimitri zimmî tasdîk etmeğin mâ-vaka‘a [bi’t-taleb ketb olundu] Fî 16 Ca sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Ağa. Ustabaşı İsak, Ustabaşı Kosti, Kabzımâl Sava, Yazıcı Yani.