İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 335 Hüküm no: 313 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Limoncu Hıristofi’nin dükkân gediği hissesinin bir kısmını Limoncu Yorgi’ye sattığı Limoncu Âsitâne-i aliyye’de vâki‘ limoncu tâifesinden Hıristofi v. Yani nâm zimmî meclis-i şer‘-i hatîrde tâife-i mersûmeden işbu hâmilü’r-rakīm Yorgi v. İstemad nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Zindan Kapısı hâricinde Limoncular İskelesi nezdinde Limoncu Yani zimmî dükkânı ittisâlinde kâin bir bâb limoncu dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Limoncu Yorgi zimmînin ve bâkī doksan sehm hisse-i şâyi‘ası akd-i âti’z-zikrin sudûruna değin benim [bâ]-hüccet-i şer‘iyye yedimizde şâyi‘an mülkümüz olmağla gedik-i mezkûrdan ben ber-minvâl-i muharrer mâlik olduğum doksan sehm hisse-i şâyi‘amın altmış sehmini yedimde ibkā ve mâ‘adâ otuz sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekim mersûmun izniyle mesfûr Yorgi zimmîye iki bin altı yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin altı yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm hisse-i şâyi‘a-i mezkûrede benim aslâ ve kat‘â alâka ve medhalim kalmayıp müşteri-i mesfûr Yorgi zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 19 Rebî‘ülâhir sene 1247 Şuhûdü’l-hâl: Kethüdâ-i muhzırân Hafız İsmail Ağa, Bölükbaşı İbrahim Edhem Ağa, Odacı Hüseyin Çelebi. Ustabaşı Nikoli v. Kostandi, Yazıcı Panayot v. Kiryako, Deli Kostandi v. İstavranos