İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 343 Hüküm no: 321 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Aci Panayot’un dükkân gediğini Tütüncü Vasil’e sattığı Tütüncü Âsitâne-i aliyye’de vâki‘ tütüncü tâifesinden Marolyalı Aci Panayot v. Yani nâm zimmî meclis-i şer‘-i hatîrde yine tâife-i mersûmeden işbu hâmiletü’r-rakīm Marolyalı Vasil v. Lazkari nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Bâb-ı Caferî hâricinde Yemiş İskelesi civârında Yoğurtçu sokağında Ahiçelebi Câmi‘-i şerîfi köşesinde kâin beher mâh otuz para kirâ-i kadîmeli fevkinde bir bâb odayı müştemil iki kepenk bir bâb tütüncü dükkânı derûnunda mevcûde Ma‘den kaleminde Süleyman Ağa ismine mukayyed ve mu‘teber beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iyye yedimde müstakıllen mâlım ve mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Vasil zimmîye iki bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin guruşu mersûm Vasil zimmî bana def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Vasil zimmînin mülk-i müşterâsı ve hakk-ı sırf olmuşdur dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu] Fî 12 C sene [12]47 Şuhûdü’l-hâl: Eş-şâhidûnü’s-sâbikūn.