İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 342 Hüküm no: 320 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yemenici Mustafa Ağa’nın tütüncü dükkân gediğini Sara bt. Abraham’a sattığı Tütüncü Mahrûse-i Galata’da Kulekapısı kurbünde Meyyitzâde mahallesinde sâkin Yemenîci Mustafa Ağa b. Halil nâm kimesne meclis-i şer‘-i münîrde Vilâyet-i Anadolu’da Eğin kazâsına tâbi‘ Apçağa karyesinde mütemekkine işbu bâ‘isetü’s-sifr Sara bt. Abraham nâm Nasrâniyenin sadrî kebîr oğlu ve tarafından husûs-ı âtîde şahsı ba‘de’t-ta‘rîfi’ş-şer‘î vekîl-i sâbitü’l-vekâlesi Tütüncü Ohannes v. Abraham nâm zimmî muvâcehesinde ikrâr-ı tâm ve takrîr-i kelâm edip İstanbul’da Duhân gümrüğü civârında Yağcılar sokağı köşesinde Trabluslu es-Seyyid Mehmed Ağa dükkânı ittisâlinde kâin Ma‘den kaleminde Sarrâf Estor zimmî ismine mukayyed şehriye dokuz guruş kirâ-i kadîmeli bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet yedimde mülküm olmağla ben ber-vech-i meşrûh mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mesfûre Sara Nasrâniye için oğlu vekîl-i mersûma beş bin elli guruşa bey‘ ü temlîk ve teslîm eylediğimde ol dahi ber-minvâl-i muharrer bi’l-vekâle iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr beş bin elli guruşu anası ve müvekkilesi mesfûrenin mâlından bana def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müvekkile-i mesfûre Sara Nasrâniyenin mülk-i müşterâsı ve hakk-ı sırf olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 12 C sene [12]47 Şuhûdü’l-hâl: Kethüdâ Mustafa Kâşif Ağa, Ünyeli Mehmed Ağa, Yazıcı Mehmed Efendi, Yiğitbaşı Hafız Ahmed Ağa, Muhzır Hüseyin Çelebi.