İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 344 Hüküm no: 323 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Nikola’nın nane bostanı gediğini Baruthane Nazırı Mehmed Said Muhib Efendi’ye sattığı Nane bostanı Ricâl-i Devlet-i aliyye’den hâlâ Baruthâneler nâzırı sa‘âdetlü Mehmed Said Muhib Efendi hazretlerine zikri âtî âlât-ı gediği bey‘ murâd eden bahçıvan tâifesinden Nikola v. Praşkova nâm zimmî meclis-i şer‘-i hatîrde işbu râfi‘u’l-kitâbi’l-müstetâb mûmâ-ileyh Mehmed Said Muhib Efendi hazretleri kıbelinden husûs-ı âtîde tasdîka vekîl-i şer‘îsi es-Seyyid Ömer Ağa b. es-Seyyid Ahmed mahzarında bi-tav‘ihi’s-sâfiyât ikrâr-ı tâm ve takrîr-i kelâm edip İstanbul’da Kocamustafapaşa kurbünde Ağaçayırı nâm mahâlde kâin nane bostanı denmekle şehîr ma‘lûmü’l-hudûd ve’l-müştemilât bir kıt‘a bostan derûnunda mevcûde beyne’l-esnâf gedik ta‘bîr olunur bir bel ve bir çapa ve bir tarak ve bir kantar ve sâir âlât-ı lâzıme-i ma‘lûme akd-i âti’z-zikrin sudûruna değin yedimde mülküm olmağla ben ber-minvâl-i meşrûh mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan [ârî] bey‘-i bâtt-ı sahîh-i şer‘î ve safka-i vâhide ile müvekkil-i mûmâ-ileyh hazretlerine bin guruşa bey‘ ü temlîk ve teslîm eylediğimde onlar dahi ber-vech-i meşrûh iştirâ ve temellük ve tesellüm ve kabz ve kabûl buyurduklarından sonra semen-i mezkûr bin guruşu mâllarından bana tamâmen def‘ ü teslîm ve ben dahi cânib-i devletlerinden ahz u kabz etmemle fîmâ-ba‘d âlât-ı gedik-i mezkûrda benim aslâ ve kat‘â alâka ve medhalim kalmayıp mebî‘-i mezkûrun tağrîr ve gabnine müte‘allika âmme-i de‘âvî ve kâffe-i mutâlebâtdan müvekkil-i mûmâ-ileyh hazretlerinin zimmetlerini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledim dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 26 C sene 1247 Şuhûdü’l-hâl: Bahçıvanlar Kethüdâsı Süleyman Ağa, Çukadâr Ali Ağa b. ( ), Kethüdâ-i muhzırân İsmail Ağa.