İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 345 Hüküm no: 324 Orijinal metin no: [62b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ahmed Efendi’nin bakkal gediği hissesini Bakkal Ustabaşı İsak ve yeğeni Bakkal Petro’ya sattığı Bakkāl Mahrûse-i Galata’ya muzâfe kasaba-i Kasımpaşa’da Na‘lıncı mahallesinde sâkin es-Seyyid Hafız Ahmed Efendi b. Hüseyin b. Mehmed meclis-i şer‘-i şerîf-i enverde Âsitâne-i aliyye’de vâki‘ bakkāl tâifesinden işbu hâmilü’r-rakīm Ustabaşı İsak v. Kiryako nâm zimmî muvâcehesinde mersûm İsak zimmînin yeğeni Bakkāl Petro v. Yuvan nâm zimmî hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Bâb-ı Caferiye hâricinde kâin tarafeyni Balmumcu Mehmed Emin Efendi ve Bakkāl Emin Ağa dükkânları ile mahdûd Ayasofya-i Kebîr vakfı musakkafâtından bir bâb bakkāl dükkânı ve ona merbût kapı-yı mezkûr dâhilinde kâin ma‘lûmü’l-hudûd bir bâb mahzen derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmeler yüz yirmi sehm i‘tibârıyla otuz sehmi Bakkāl Ananosti zimmînin ve mâ‘adâ doksan sehmi dahi akd-i âti’z-zikrin sudûruna değin benim bâ-hüccet-i şer‘iyye yedimizde mülkümüz olmağla gedik-i mezkûrlardan ben ber-minvâl-i muharrer mâlik olduğum doksan sehm hisse-i şâyi‘amın altmış sehmini mersûm İsak zimmîye beş bin guruşa ve otuz sehmini dahi hâzır-ı mersûm Petro zimmîye iki bin beş yüz guruşa her birine tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile ve müşterekim izniyle bey‘ ü temlîk ve lâyıkı vechile teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl eylediklerinden sonra semenleri olan cem‘an yedi bin beş yüz guruşu bana tamâmen def‘ ü teslîm ve ben dahi yedlerinden [63a] bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabinlerine müte‘allika âmme-i da‘vâdan tarafeynden her birimiz âharın zimmetlerini kabûllerini hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrların ber-i‘tibâr-ı merkūm doksan sehm hisse-i şâyi‘alarında benim aslâ ve kat‘â alâka ve medhalim kalmayıp müşteriyân-ı mersûmân İsak ve Petro zimmîlerin mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 12 C sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako v. Vasil, Ustabaşı Yakof v. Yuvan, Yazıcı Dimitri, Kabzımâl Sava.