İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 345 Hüküm no: 325 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Limoncu Nikita’nın dükkân gediği hissesini Limoncu Nikoli’ye sattığı Limoncu Mahmiye-i İstanbul hısnı ebvâbından Balatkapısı dâhilinde Parmakkapı nâm mahâlde Limoncu Nikita v. Nikola nâm zimmî meclis-i şer‘-i hatîrde işbu bâ‘isü’s-sifr Limoncu Nikoli v. İstavri nâm zimmî tarafından husûs-ı âtîde tasdîka vekîl-i şer‘îsi Yani v. Yorgi nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Bâb-ı Caferî hâricinde Zahîreciler içinde köşebaşında tuzcu dükkânı ittisâlinde kâin bir bâb limoncu dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi vekîl-i mersûm Yani zimmînin ve otuz sehmi Mihal zimmînin ve otuz sehmi dahi akd-i âti’z-zikrin sudûruna değin benim yedimizde mülk ve hakkımız olmağla âlât-ı gedik-i mezkûrdan ben ber-minvâl-i muharrer mâlik olduğum otuz sehm hisse-i mezkûremi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mesfûr Nikoli zimmîye iki bin yedi yüz elli guruşa bâ-izn-i şürekâ bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr iki bin yedi yüz elli guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d âlât-ı gedik-i mezkûrda benim aslâ ve kat‘â alâka ve medhalim kalmayıp müşteri-i müvekkil-i mersûm Nikoli zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 26 C sene 1247 Şuhûdü’l-hâl: Bölükbaşı İbrahim Edhem Ağa, Mahmud Çelebi el-Muhzır. Aci Nikoli v. Kostandi, Aci Panayot v. Kiryako, Yorgi v. İstemad. Ustabaşı Kiryako v. Vasil, Ustabaşı Yakof v. Yuvan, Yazıcı Dimitri, Kabzımâl Sava.