İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 347 Hüküm no: 327 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Raşid’in evini Debbağ Yunus Camisi Vakfı’na sattığı Vakfa akār için mülk menzil mübâya‘ası Debbâğ Yunus Mahmiye-i İstanbul’da cennet-mukīm Sultan Selim Han-ı kadîm -tâbe serâhu- hazretlerinin câmi‘-i şerîfleri civârında Debbâğ Yunus Câmi‘-i şerîfi mahallesi sükkânından el-Hâc Mehmed Raşid b. el-müteveffâ el-Hâc Salih Ağa b. Ali meclis-i şer‘-i şerîf-i lâzımü’t-tevkīrde Dârü’l-hilâfeti’l-aliyye’de mesned-nişîn-i şerî‘at-i garrâ olan fuhûl-i kirâm hazerâtı nezâretlerinde mahmî evkāfdan mârru’z-zikr Debbâğ Yunus Câmi‘-i şerîfi vakfının hâlâ bâ-berât mütevellîsi Rumeli kuzâtı eşrâfından işbu râfi‘u’l-kitâbi’l-müstetâb es-Seyyid el-Hâc Halil Efendi b. el-Hâc Mehmed mahzarında bi’t-tav‘i’s-sâf ikrâr-ı tâm ve takrîr-i kelâm edip akd-i âti’z-zikrin sudûruna değin ırsen yedimde mülk ve hakkım olup mahalle-i merkūmede vâki‘ bir tarafdan eşrâf-ı kuzâtdan Mühürdâr es-Seyyid Ali Rıza Efendi menzili ve iki tarafdan Kahve[ci]başı Mehmed Ağa uhdesinde olan vakıf bahçe ve menzil ve bir tarafdan tarîk-i âm ile mahdûd hâriciyede ulyâda bir bâb oda ve vüstâda iki bâb oda ve süflâda bir bâb oda ve bir sofa ve bir kenîf ve bir ahır ve bir mikdâr havlu ve dâhiliyede ulyâda bir bâb oda ve kenîf ve vüstâda iki bâb oda ve bir sofa ve bir köprülü oda ve süflâda bir câriye odası ve bir matbah ve mâ-i lezîz bacası ve bir mikdâr havlu ve sokak kapısı ile karşısında vâki‘ etrâf-ı erba‘adan mûmâ-ileyh Mühürdâr es-Seyyid Ali Rıza Efendi menzili ve tarîk-i âm ile mahdûd fevkānî iki bâb taş oda ve bir hamam ve bir câmekân ve matbah ve kömürlük ve kenîf ve tulumbalı bir bi’r-i mâ ve su hazînesi ve zîr-i zemîn mahzen ve bir mikdâr havlu ve eşcârlı bahçe ve diğer sokak kapısını müştemilât-ı sâire-i ma‘lûmeyi hâvî bir bâb mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık [63b] tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile vakf-ı mezkûra akār olmak üzere on bin guruşa mütevellî-i mûmâ-ileyhe bey‘ u teslîm eylediğimde mütevellî-i mûmâ-ileyh dahi ber-minvâl-i muharrer bi’t-tevliye iştirâ ve tesellüm ve kabz ve kabûl eylediğinden sonra semeni olan meblağ-ı mezkûr on bin guruşun iki bin beş yüz guruşunu mâl-ı vakfdan bana def‘ ü teslîm ve ben dahi yedinden ahz u kabz edip bâkīsi olan yedi bin beş yüz guruşu zikri âtî mu‘acceleye takās için cânib-i vakfda ibkā etmemle fîmâ-ba‘d menzil-i mezkûrda benim aslâ ve kat‘â alâka ve medhalim kalmayıp vakf-ı mezkûr müstagallâtından oldukdan sonra mütevellî-i mûmâ-ileyh menzil-i mezbûru gıbbe’t-tahliyeti’ş-şer‘iyye ve’t-takābuzi’l-mer‘î yedi bin beş yüz guruş icâre-i mu‘accele-i misliyye ve işbu târîhden beher mâh yüz elli akçe icâre-i müeccele-i mümâsele ile bana bi’t-tevliye îcâr ve teslîm ve ben dahi ber-minvâl-i muharrer istîcâr ve tesellüm ve kabûl eylediğimden sonra ânifen zikri mürûr eden yedi bin beş yüz guruşu mu‘accele-i mezkûreye bi’t-terâzî takās ve mahsûb edip mebî‘-i mezkûrun tağrîr ve gabnine ve semen ve mu‘accele-i mezkûrelere müte‘allika âmme-i de‘âvî ve kâffe-i mutâlebâtdan cânib-i vakfı ve mütevellî-i mûmâ-ileyh es-Seyyid el-Hâc Halil Efendi’nin zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledim dedikde mukırr-ı merkūm el-Hâc Mehmed Raşid’i cemî‘ kelimât-ı meşrûhasında mütevellî-i mûmâ-ileyh vicâhen <> tasdîk etmeğin mâ-hüve’l-vâki‘ bi’l-ibtigā sebt ü imlâ olundu. Fî 9 Cumâdelâhire sene 1247 İmâm-ı mahalle-i mezkûre es-Seyyid Hafız Mehmed Efendi b. Mehmed, Müderrisînden Yusuf Ziyaeddin Efendi b. Yakub, Müezzin-i mahalle Hüseyin Efendi b. Mahmud, Yoklamacı-i evvel Hafız Mustafa Efendi, Kömürcüler Kethüdâsı Abdi Efendi b. Mehmed, Muhtar-ı evvel es-Seyyid Ali Yazıcı b. Halil, Câbî-i vakf Hafız Abdullah Efendi, Kethüdâ-i muhzırân Hafız İsmail Efendi, Muhzır Hüseyin Çelebi b. Yusuf.