İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 348 Hüküm no: 328 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Papasoğlu Andon’un dükkân gediğini Ahmed Abdülaziz Ağa ile hanımı Rukiye Hatun’a sattığı Tütüncü Âsitâne-i aliyye’de vâki‘ tütüncü esnâfından İnözlü Papasoğlu Andon v. Anaştaş nâm zimmî meclis-i şer‘-i hatîrde işbu bâ‘isü’l-kitâb kendi nefsinden asıl ve zevcesi zâtı mu‘arrefe Rukiye Hatun bt. Ahmed tarafından husûs-ı âtîde tasdîka vekîl-i şer‘îsi Köşe ustası Ahmed Abdülaziz Ağa b. el-Hâc Mehmed Emin mahzarında ikrâr-ı tâm ve takrîr-i kelâm edip mahmiye-i mezbûrede <> Gedikpaşa kurbünde Kaliçeci Hasan Câmi‘-i şerîfi karşısında hekîm ve hallâc dükkânları beynlerinde kâin şehriye sekiz guruş kirâ-i kadîmeli bir bâb kârgir tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iyye yedimde müstakıllen mâlım ve mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcân-ı asıl ve müvekkile-i merkūmâna ale’l-iştirâki’s-seviyy altı bin guruşa bey‘ ü temlîk ve teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr altı bin guruşu bana tamâmen def‘ ü teslîm ve ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteriyân-ı asıl ve müvekkile-i zevcân-ı merkūmân Rukiye Hatun ve Ahmed ve Abdülaziz Ağa’nın ber-vech-i iştirâk mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî-selhi Cumâdelâhire sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yazıcı es-Seyyid Mehmed Nuri Efendi, Yiğitbaşı Hafız Ahmed Ağa, Silivrili Mehmed Ağa.