İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 349 Hüküm no: 329 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Kostandi ile Sarraf Asvader’in iki adet bakkal dükkânı gedik hisselerini Bakkal Vasil’e sattıkları Bakkāl Kaydı ihrâc-şüd Fî 21 Ca sene [12]65 Âsitâne-i aliyye’de vâki‘ bakkāl esnâfından Kostandi v. İspir[o] nâm zimmî asâleten ve mahmiye-i mezbûrede Tevkī‘î Cafer mahallesinde mütemekkin sarrâf tâifesinden Asvader v. Serkiz nâm zimmî tarafından husûs-ı âti’l-beyânda vekîl olduğu Bakkāl Dimitri v. Yuvan ve Bakkāl Yorgi v. Nikola nâm zimmîler şehâdetleriyle sâbit olan Kabril v. İpek(?) nâm zimmî vekâleten meclis-i şer‘-i hatîrde işbu hâmilü’r-rakīm Bakkāl Vasil v. İspir[o] nâm zimmî muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mahkiyede Kumkapı kurbünde Tülbentçi Câmi‘-i şerîfi civârında kâin Selami Çelebi dükkânı denmekle meşhûr açık bir bâb ve civârında vâki‘ Ahmed Efendi dükkânı denmekle ma‘rûf kapalı bir bâb ki cem‘an iki bâb bakkāl dükkânları derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmelerin yüz yirmişer sehm i‘tibârıyla <> kırkar sehmi mersûm Vasil zimmînin babası mesfûr İspiro v. Yasef zimmînin ve kezâlik kırkar sehmi Darbhâneci Agop zimmînin ve onar sehmi Kirkor v. Karabet zimmînin ve yirmişer sehmi asıl-ı mersûm Kostandi zimmî benim ve onar sehmi dahi vekîl-i mersûm Kabril zimmî müvekkilim mersûm Asvader zimmînin akd-i âti’z-zikrin sudûruna değin yedimizde bâ-hüccet-i şer‘iyye mülkümüz olmağla asıl-ı mersûm Kostandi zimmî gedik-i mezkûrlardan ben ber-minvâl-i muharrer mâlik olduğum yirmişer sehm hisse-i şâyi‘amı beş yüz yirmi beş guruşa ve vekîl-i mesfûr Kabril zimmî gedik-i merkūmlardan müvekkil-i mersûmun ber-minvâl-i meşrûh mâlik olduğu onar sehmi üç yüz guruşa tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Vasil zimmîye bi’l-asâle ve bi’l-vekâle bey‘ ü temlîk ve her birini lâyıkı vechile teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz edip semenleri olan cem‘an sekiz yüz yirmi beş guruşu mersûm Vasil zimmî bize tamâmen def‘ ü teslîm ve biz dahi yedinden bi’l-asâle ve bi’l-vekâle ahz u kabz etmemizle mebî‘-i mezkûrların tağrîr ve gabinlerine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt eyledik ba‘de’l-yevm gedik-i mezkûrların ber-i‘tibâr-ı merkūm yirmişer sehminde asıl-ı mersûm benim ve onar sehmde vekîl-i mersûm müvekkilim mersûmun aslâ ve kat‘â alâka ve medhallerimiz <> kalmayıp müşteri-i mesfûr Vasil zimmînin mülk-i müşterâsı ve hakk-ı sırfı olmuşdur dediklerinde gıbbe’t-tasdîk[i’ş-şer‘î mâ-vaka‘a bi’t-taleb ketb olundu] Fî 26 C sene [12]47 Şuhûdü’l-hâl: Pazarbaşı Süleyman Ağa, Bölükbaşı Abdi Ağa, Mahmud Çelebi el-Muhzır. Ustabaşı İsak, Ustabaşı Ananosti, Bakkāl Yuvan.