İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 361 Hüküm no: 341 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrişim bükücü Kigork’un ibrişim destgâhını Yorgi’ye sattığı İbrişim bükücü Âsitâne-i aliyye’de vâki‘ ibrişim bükücü tâifesinden Kigork v. Markar nâm zimmî meclis-i şer‘-i hatîrde tâife-i mersûmeden işbu bâ‘isü’s-sifr Yorgi v. Sava nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olup mahmiye-i mezbûrede Fazlıpaşa bodrumunda kâin bir aded ibrişim bükücü destgâhımı bi’l-cümle âlât-ı lâzımesiyle tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Yorgi zimmîye bin dört yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ <> ve temellük ve tesellüm ve kabz ve kabûl edip semeni olan meblağ-ı mezkûr bin dört yüz guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d destgâh-ı mezkûrda benim aslâ ve kat‘â alâka ve medhalim kalmayıp müşteri-i mesfûr Yorgi zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 7 Receb sene 1247 Şuhûdü’l-hâl: Kethüdâ-i örücü Osman Ağa b. Ahmed, Ustabaşı Ali Molla b. İsmail, es-Seyyid eş-Şeyh Mehmed Emin Efendi, Odacı Hüseyin Çelebi.