İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 360 Hüküm no: 340 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ahmed’in Eyüb’deki evini Rukiye Hatun’a sattığı Mülk menzil Medîne-i Eyüb’de Süleyman Subaşı [mahallesi] sükkânından es-Seyyid Hafız Ahmed b. Ali b. Abdullah tarafından husûs-ı âtîde vekîl olduğu Samancı es-Seyyid Süleyman b. Abdullah ve Samancı Mehmed Ârif b. Mehmed şehâdetleriyle sâbit olan Samancı es-Seyyid Hüseyin b. Mehmed meclis-i şer‘-i münîrde mahalle-i mezbûrede sâkine işbu bâ‘isetü’l-kitâb mu‘arrefetü’z-zât Rukiye bt. Musa nâm hatun mahzarında bi’l-vekâle ikrâr-ı tâm ve takrîr-i kelâm edip mahalle-i mezkûrede kâin bir tarafdan Rumeli kuzâtı eşrâfından el-Hâc Veliyyüddin Efendi menzili ve iki tarafdan merkūme Rukiye Hatun menzili ve bir tarafdan tarîk-i âm ile mahdûd fevkānî bir oda ve sofa ve tahtında bir oda bir matbah ocağı ve kenîf ve havlu ve ahır ve müştemilât-ı sâire-i ma‘lûmeyi hâvî bir bâb mülk menzil müvekkilim mezbûrun akd-i âti’z-zikrin sudûruna değin bâ-hüccet-i şer‘iyye yedinde mülkü olmağla ben müvekkilim merkūmun ber-minvâl-i muharrer mâlik olduğu menzil-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile merkūme Rukiye Hatun’a sekiz yüz elli guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr sekiz yüz elli guruşa müşteriye-i merkūme bana def‘ ü teslîm ve ben dahi yedinden bi’l-vekâle ahz u kabz <> edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt eyledik fîmâ-ba‘d menzil-i mezkûrda müvekkilim mezbûrun aslâ ve kat‘â alâka ve medhali kalmayıp müşteriye-i merkūme Rukiye Hatun’un mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 19 C sene 1247 Şuhûdü’l-hâl: Es-seyyid İbrahim İbiş b. Osman, İmâmoğlu Hüseyin b. Mustafa, el-Hâc Veliyyüddin Efendi b. Mustafa, Mustafa b. Ahmed, mahalle-i mezkûre imâmı Mustafa Efendi b. Derviş.