İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 362 Hüküm no: 343 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve Bilâd-ı selâse kazancı esnafı kethüdalığına Mustafa Ağa’nın tayin edildiği Kethüdâ nasbı Âsitâne-i aliyye ve Bilâd-ı selâse’de vâki‘ Müslim ve re‘âyâ kazgancı esnâfının kethüdâları olan el-Hâc Ahmed Ağa bu def‘a kethüdâlık-ı mezkûrdan bi’l-iştikâ azlolunup esnâf-ı merkūmenin mu‘temed ve muhtârları idiği hâlâ muhtesib-i İstanbul sa‘âdetlü Mehmed Emin Faik Efendi hâzır olduğu hâlde re’yiyle esnâf-ı mezkûreden zeyl-i vesîkada muharrerü’l-esâmî Müslimînin ihbârlarıyla zâhir olan esnâf-ı merkūmeden işbu bâ‘isü’l-kitâb Mustafa Ağa b. Mehmed’i hâkim-i hâsim vâlâ cenâb veffakallâhu te‘âlâ bi’s-sıdk ve’s-savâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı mezbûreden bir kimesneye hilâf-ı şer‘-i şerîf ve mugāyir-i kānûn-ı münîf ta‘addî ve rencîde etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete müte‘ahhid olmağın mâ-vaka‘a [bi’t-taleb ketb olundu] Fî 19 Receb sene 1247 Şuhûdü’l-hâl: Mütevellî İbrahim Ağa, Yiğitbaşı es-Seyyid Mehmed Ağa, Ali b. İbrahim, es-Seyyid Mustafa b. Mehmed, Mehmed Ağa b. el-Hâc Musa, Mehmed Emin Ağa b. Mustafa.