İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 363 Hüküm no: 344 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keseci Esetban ile kız kardeşi Aranik’in tütüncü gedik hisselerini Tütüncü Bedros’a sattıkları Tütüncü Mahmiye-i İstanbul’da Samatya kurbünde Sancakdârhayreddin mahallesinde mütemekkin Keseci Esteban v. Mıgırdıç nâm zimmî asâleten ve li-ebeveyn kız karındaşı Aranik Nasrâniyenin zevci ve tarafından husûs-ı âti’l-beyânda vekîl olduğu şahsını ârifân Hafız Ahmed Ağa b. Halil ve Hasan Ağa b. İbrahim şehâdetleriyle sâbit olan Mıhcı Ohannes v. Kazer nâm zimmî vekâleten meclis-i şer‘-i hatîrde tütüncü tâifesinden işbu hâmilü’r-rakīm Bedros v. Haçador nâm zimmî muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûre hısnı ebvâbından Yedikule hâricinde Selhhâneler nezdinde na‘lband ve aşçı dükkânları beyninde kâin şehriye dört guruş kirâ-i kadîmeli bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin benimle kız karındaşım müvekkile-i mersûmenin yedimizde iştirâken mülkümüz olmağla gedik-i mezkûrdan ben ber-minvâl-i muharrer mâlik olduğum nısf hisse-i şâyi‘amı asâleten ve vekîl-i mersûm zevcesi müvekkile-i mersûmenin kezâlik ber-vech-i muharrer mâlike olduğu nısf hisse-i şâyi‘asını vekâleten tarafeynden îcâb ve kabûlü hâvî şürût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Bedros zimmîye bin iki yüz elli guruşa bi’l-asâle ve bi’l-vekâle bey‘ ü temlîk ve teslîm eylediğimizde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr bin iki yüz elli guruşu bize tamâmen def‘ ü teslîm ve biz dahi yedinden bi’l-asâle ve bi’l-vekâle ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm gedik-i mezkûrda mersûm Esetban zimmî benim ve vekîl-i mersûm zevcem ve müvekkilem mersûme Aranik Nasrâniyenin aslâ ve kat‘â alâka ve medhallerimiz kalmayıp müşteri-i mersûm Bedros zimmînin mülk-i müşterâsı ve hakk-ı sırfı olmuşdur dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî-selhi Recebi’l-ferd sene 1247 Şuhûdü’l-hâl: Yiğitbaşı Ahmed Ağa, Yazıcı Mehmed Efendi, Kethüdâ Mustafa Kâşif Ağa, Kethüdâ vekîli Mehmed Ağa ve gayruhum.