İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 401 Hüküm no: 390 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Dimitri’nin bakkal gediği hissesini Bakkal Tanaş’a sattığı Bakkāl Âsitâne-i aliyye’de vâki‘ bakkāl tâifesinden Dimitri v. İstati nâm zimmî meclis-i şer‘de tâife-i mersûmeden işbu bâ‘isü’s-sifr Tanaş v. Nikola nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Balatkapısı dâhilinde Sultan Hamamı civârında kâin Çavuşbaşı dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış yedi buçuk sehmi mersûm Tanaş zimmînin ve mâ‘adâ elli iki buçuk sehmi dahi akd-i âti’z-zikrin sudûruna değin benim yedimde mülküm olmağla ben gedik-i mezkûrdan ber-minvâl-i muharrer mâlik olduğum elli iki buçuk sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Tanaş zimmîye beş yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr beş yüz guruşu bana def‘ ü teslîm ve ben dahi yedinden tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı <> sahîh-i şer‘î ile ibrâ ve iskāt eyledik fîmâ-ba‘d gedik-i mezkûrun elli iki buçuk sehm hissesinde benim aslâ ve kat‘â alâka ve medhalim kalmayıp müşteri-i mesfûr Tanaş zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 11 Ramazan sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako, Kabzımâl Sava, Yazıcı Yani.