İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 400 Hüküm no: 389 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı Kigork’un arsasını Topkapı Kilisesi mütevellisi Kirkor’a sattığı Kocamustafapaşa’da arsa mübâya‘ası Mahmiye-i İstanbul’da Çarşambapazarı kurbünde Cafer mahallesinde mütemekkin boyacı esnâfından Kigork v. Aram nâm zimmî meclis-i şer‘-i hatîrde kuyumcu tâifesinden Topkapı kilisesi mütevellîsi işbu hâmilü’r-rakīm Kirkor v. Avanis nâm zimmî tarafından husûs-ı âti’l-beyânda tasdîka vekîli Avakim v. Herakliyus nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin bâ-hüccet-i şer‘iyye yedimde mülk ve hakkım olup mahmiye-i mezbûrede Kocamustafapaşa mahallesinde vâki‘ Kurusebil köşesi nâm mahâlde kâin etrâf-ı erba‘ası el-Hâc Ahmed Ağa ve Kasab Halil Ağa ve Basmacı Memiş Ağa ve Osman Efendi ve İbrahim Ağa ile İpekçi Serope ve Papas Serkiz zimmîler menzilleri ve tarîk-i âm ile mahdûd iki yüz elli zirâ‘ bir bâb kerpiçhâne arsamı bi-cümleti mâ-yeştemilühû ve yahvîhi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile müvekkil-i mersûm Kirkor zimmîye sekiz yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr sekiz yüz guruşu müvekkil-i mersûm bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî <> bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d arsa-i mezkûrede benim aslâ ve kat‘â alâka ve medhalim kalmayıp müşteri-i müvekkil-i mersûm Kirkor zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 18 Şevvâl sene 1247 Şuhûdü’l-hâl: Kethüdâ-i muhzırân İsmail Ağa, Muhzır Hüseyin Çelebi, Muhzır Mahmud Çelebi. Mismârcı Kalos v. Dador, Fincancı Sahak v. Kirkor.