İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 404 Hüküm no: 394 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Şemseddin Efendi’nin tütüncü dükkânı gediğini Berber Mehmed Ağa’ya sattığı Tütüncü Mahrûse-i Galata’ya muzâfe kasaba-i Beşiktaş nâhiyesine tâbi‘ Kılıç Ali nâm mahâlde Sinan Paşa-yı Cedîd mahallesinde sâkin Rumeli kuzâtı eşrâfından es-Seyyid Mehmed Şemseddin Efendi b. es-Seyyid Feyzullah nâm kimesne meclis-i şer‘-i münîrde berber esnâfından işbu bâ‘isü’l-kitâb Mehmed Ağa b. Süleyman mahzarında ikrâr-ı tâm ve takrîr-i kelâm edip İstanbul’da Ayasofya-i Kebîr Hamamı nezdinde manav dükkânı ve mağaza beynlerinde kâin şehriye beş guruş kirâ-i kadîmeli Ma‘den kaleminde el-Hâc Ali Ağa ismine mukayyed ve mu‘teber üç kepenk bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin müstakıllen yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mehmed Ağa’ya beş yüz guruşa bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Mehmed Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 18 Şevvâl sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yiğitbaşı Hafız Ahmed Ağa, Kâtib Mehmed Efendi ve gayruhum.