İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 405 Hüküm no: 395 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve Bilâd-ı Selâse’deki paçacı esnafı kethüdalığına Tahtakaleli İsmail Ağa’nın tayin edildiği Kethüdâ nasbı Âsitâne-i aliyye’de ve Bilâd-ı selâse’de vâki‘ paçacı esnâfının kethüdâları olan İbrahim Ağa kethüdâlık-ı mezkûrdan bu def‘a bi’l-iktizâ azlolunduğuna binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkadam muharrerü’l-esâmî Müslimînin ihbâr ve iltimâsları ve hâlâ muhtesib-i İstanbul sa‘âdetlü Mehmed Emin Faik Efendi’nin re’yi munzam idiği tarafından mürsel çukadârı Mustafa Ağa’nın inhâsıyla zâhir olan esnâf-ı merkūmeden işbu bâ‘isü’l-kitâb Tahtakaleli İsmail Ağa nâm kimesneyi hâkim-i hâsim vâlâ cenâb veffakallâhu te‘âlâ bi’s-sıdk ve’s-savâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā semt ü imlâ olundu. Fî 24 Şevvâl sene 1247 Şuhûdü’l-hâl: Yunus Ağa b. İsmail, Hüseyin Ağa b. İbrahim, Mehmed Emin Ağa b. Mahmud, Veys b. Abdi, Molla Musa b. İbrahim.