İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 409 Hüküm no: 402 Orijinal metin no: [74b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marya Nasraniyenin bakkal dükkânı gediğindeki hissesini Bakkal Sünbül’e sattığı Bakkāl Ali Bey dükkânı Vilâyet-i Anadolu’da Konya sancağında vâki‘ Aksaray kazâsına tâbi‘ Gelveli (Gelveri) karyesinde mütemekkine Marya bt. Mihal v. Hıristo nâm Nasrâniyenin eniştesi ve tarafından husûs-ı âti’l-beyânda vekîl olduğu şahsını bilir Aci Avram v. Lazari ve İstefan v. Apostol nâm zimmîler şehâdetleriyle sâbit olan Yağcı Yorgi v. Ağnab nâm zimmî meclis-i şer‘-i hatîrde Âsitâne-i aliyye’de vâki‘ bakkāl tâifesinden işbu bâ‘isü’s-sifr Sünbül v. Yuvan nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i mezbûrede Çarşambapazarı nezdinde karakolhâne karşısında kâin Ali Bey dükkânı denmekle meşhûr bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi mersûm Sünbül zimmînin ve otuz sehmi Elisava Nasrâniyenin ve on dokuz sehmi Yorgi zimmînin ve on bir sehmi Marita Nasrâniyenin ve bâkī otuz sehmi dahi akd-i âti’z-zikrin sudûruna değin müvekkilem mersûme Marya Nasrâniyenin bâ-hüccet-i şer‘iyye yedlerinde mülkleri olmağla gedik-i mezkûrdan müvekkilem mersûmenin ber-minvâl-i muharrer mâlike olduğu otuz sehm hisse-i şâyi‘asını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Sünbül zimmîye bin beş yüz guruşa bi’l-vekâle bey‘ ü temlîk ve lâyıkı vechile teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d gedik-i mezkûrun hisse-i şâyi‘a-i merkūmesinde müvekkilem mesfûrenin aslâ ve kat‘â alâka ve medhali kalmayıp müşteri-i mersûm Sünbül zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 17 Şevvâl sene [1]247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı İsak, Ustabaşı Ananosti, Yazıcı Dimitri, Kabzımâl Sava.