İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 409 Hüküm no: 401 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bozacı Antakyalı Mehmed Ağa’nın bozacı esnafı kethüdalığına tayin edildiği Kethüdâ nasbı Âsitâne-i seniyye’de vâki‘ bozacı esnâfının umûrlarını müdîr-i müstakıl kethüdâları olmamağla esnâf-ı merkūme üzerlerine müstakıllen bir kethüdâ nasb u ta‘yîn olunmasını esnâf-ı mezkûrenin iltimâs ve istid‘âlarına mebnî irâde-i hazret-i Seraskerî ta‘alluk ve mûcebince İhtisâb-ı İstanbul kıbelinden ber-mûceb-i nizâm-ı müstahsene esnâf-ı merkūmûnun kefâletleriyle verilen memhûr tezkire mantûkunca esnâf-ı mezkûreden olup emîn ve mu‘temed ve mücerrebü’l-etvâr idiği bi’l-ihbâr zâhir olan işbu bâ‘isü’l-kitâb Antakyalı el-Hâc Mehmed Ağa b. el-Hâc Haydar’ı hâkim-i hâsim vâlâ cenâb veffekallâhu te‘âlâ bi’s-sıdk ve’s-savâb efendi hazretleri esnâf-ı mezkûre üzerine kethüdâ nasb u ta‘yîn ve esnâf-ı mezkûreden bir ferde hilâf-ı şer‘-i şerîf ve mugāyir-i kānûn-ı münîf rencîde ve remîde etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-vaka‘a bi’t-taleb ketb olundu. Fî 25 [Şevvâl] sene 1247 Şuhûdü’l-hâl: Kethüdâ-i muhzırân İsmail Ağa, Muhzır Hüseyin Çelebi, Edirnekapılı Mehmed, Yiğitbaşı Nuh.