İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 414 Hüküm no: 408 Orijinal metin no: [75b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katrine’ye bakkal dükkânı gediği için hüccet verilmesi Mercan’da bakkāl Vilâyet-i Rumeli’de Yenişehir-i Fener kazâsına tâbi‘ Kireşova karyesinde mütemekkine işbu hâmilü’r-rakīm Katrine bt. Kostandi nâm Nasrâniye tarafından husûs-ı âtîde vekîl-i sâbitü’l-vekâlesi Bakkāl Kosti v. Yorgi nâm zimmî meclis-i şer‘-i hatîrde bi’l-vekâle takrîr-i kelâm ve bast ani’l-merâm edip İstanbul’da Mercan Ağa Câmi‘-i şerîfi civârında kebabcı <> karşısında Yaldızlıhan ittisâlinde kâin Mehmed Çelebi dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla on sehmi Aci Yani zimmî veresesi Marya ve Praşkova ve Zoviçe Nasrâniye ile Kosti zimmînin ve on sehmi hâlik Yorgi zimmî veresesinin ve altı sehmi diğer Yorgi zimmînin ve yirmi sehmi Kosta zimmînin ve on dört buçuk sehmi İstamo bt. Niko ve on üçer buçuk sehmden kırk buçuk sehmi Uğuriçe ve diğer Zoviçe ve âhar Praşkova Nasrâniyelerin ve on sehmi hâlik Yani zimmî veresesinin ve dokuz sehmi müvekkilem mersûme Katrine Nasrâniyenin yedlerinde şâyi‘an mülkleri olup lâkin âlât-ı gedik-i mezkûrun dokuz sehm hisse-i mezkûresi müvekkilem mesfûrenin mülkü olduğunu nâtıka yedinde hücceti olmamağla husûs-ı mezkûre esnâf-ı merkūmeden vukūf ve ıttılâ‘ları olan kimesnelerden istihbâr olunup kıbel-i şer‘den yedine bir kıt‘a hüccet i‘tâ olunmak bi’l-vekâle murâdımdır dedikde fi’l-hakīka gedik-i mezkûrun dokuz sehm hisse-i mezkûresi müvekkile-i mersûme Katrine Nasrâniyenin yedinde mülk-i mevrûsu olduğunu esnâf-ı mezkûreden zeyl-i vesîkada muharrerü’l-esâmî kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka bi’t-taleb ketb ü imlâ olundu. Fî 19 Muharrem sene 1247 Şuhûdü’l-hâl: Eş-şâhidûnü’s-sâbikūn.