İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 415 Hüküm no: 409 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstamo ve kızlarına bakkal dükkânı gediği için hüccet verilmesi Mercan’da bakkāl Nüsha-i sâniye ve sâlise ve râbi‘a verilmişdir. Vilâyet-i [Rumeli’de] Yenişehir-i Fener kazâsına tâbi‘ Kireşova karyesinde mütemekkineler işbu hâmilâtü’r-rakīm İstamo bt. Niko ve sadriye kebîre kızları Uğuriçe ve Zoviçe ve Praşkova benât-ı el-hâlik Yorgi nâm Nasrâniyelerden mersûme Zoviçe Nasrâniyenin zevci ve taraflarından vekîl-i sâbitü’l-vekâleleri Bakkāl Yorgi v. Yani nâm zimmî meclis-i şer‘-i hatîrde bi’l-vekâle takrîr-i kelâm ve ta‘bîr ani’l-merâm edip İstanbul’da Mercan Ağa Câmi‘-i şerîfi civârında kebabcı dükkânı karşısında Yaldızlıhan ittisâlinde kâin Mehmed Çelebi dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla on sehmi Aci Yani veresesi Marya ve diğer Praşkova ve âhar Zoviçe Nasrâniyeler ile Kosti zimmînin ve on sehmi hâlik Yani zimmî veresesinin ve on sehmi hâlik Yorgi zimmî veresesinin ve altı sehmi diğer Yorgi zimmînin ve yirmi sehmi Kosta zimmînin ve dokuz sehmi Katrine Nasrâniyenin ve on dört buçuk sehmi müvekkilelerim mesfûrâtdan mersûme İstamo ve on üçer buçuk sehmden kırk buçuk sehmi mersûmât Uğuriçe ve Zoviçe ve Praşkova Nasrâniyelerin yedlerinde şâyi‘an mülkleri olup lâkin âlât-ı gedik-i mezkûrun hisse-i mezkûreleri müvekkilelerim mersûmâtın yedlerinde mülkleri olduğunu nâtıka hüccetleri olmamağla husûs-ı mezkûre esnâf-ı merkūmeden vukūf ve ıttılâ‘ları olan kimesnelerden istihbâr olunup kıbel-i şer‘den yedlerine birer kıt‘a hüccet i‘tâ olunmak bi’l-vekâle murâdımdır dedikde fi’l-hakīka hisse-i şâyi‘a-i mezkûreler vekîl-i mersûm Yorgi zimmînin müvekkileleri mesfûrâtın yedlerinde zevci ve babaları hâlik-i mersûm Yorgi zimmîden mevrûs mülkleri olduğunu esnâf-ı mezkûreden zeyl-i vesîkada muharrerü’l-esâmî kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka bi’t-taleb ketb ü imlâ olundu. Fî 19 Muharrem sene 1247 Şuhûdü’l-hâl: Eş-şâhidûnü’s-sâbikūn.