İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 435 Hüküm no: 434 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedikule kasapları ustalarından Hasan Efendi ile Hüseyin Ağa ve Ahmed Ağa’nın kasaplık için inan şirketi kurdukları Kasab ustalarının akd-i şirket hücceti Hilâl-i sütûrda mastûr husûsun mahâllinde ketb ü tahrîri’çün cânib-i şerî‘at-i garrâdan bi’l-iltimâs me’zûnen irsâl olunan vekāyi‘ kâtibimiz Hasan Hasbi Efendi Kulle-i heft hâricinde vâki‘ mîrî ganem selhhânesine varıp Kabzımâl Hüseyin Efendi ve Kurna kâtibi es-Seyyid el-Hâc Ahmed Efendi ve Kethüdâ el-Hâc Hasan Ağa ve Eğrikapı Kethüdâsı es-Seyyid el-Hâc İbrahim Ağa ve Yiğitbaşı es-Seyyid el-Hâc Haşim Ağa ve mahâll-i mezkûr kasablarından diğer el-Hâc Hasan Ağa ve es-Seyyid Ali Ağa ve el-Hâc Hüseyin Ağa ve es-Seyyid el-Hâc İbrahim Ağa ve Edirnekapılı İbrahim Ağa ve Topkapılı Mustafa Ağa ve Üsküdar’da Mirahurlu İsmail Ağa ve Yenimahalleli Ahmed Ağa ve sâir mazbûtü’l-esâmî Müslimîn huzûrlarında akd-i meclis-i şer‘-i nebevî ettikde Yedikule kasabânı ustalarından es-Seyyid el-Hâc Hasan Efendi b. es-Seyyid Mehmed meclis-i ma‘kūd-ı mezkûrda yine mahâll-i mezkûr kasabları ustalarından işbu bâ‘isiyyü’l-kitâb Hüseyin Ağa b. Zeynelâbidin ve Ahmed Ağa b. Ömer mahzarlarında ikrâr-ı tâm ve takrîr-i kelâm edip ben ve merkūmân Hüseyin Ağa ve Ahmed Ağa’dan her birimiz mâlımızdan ma‘lûmü’l-mikdâr sermâye vaz‘ ve biribirine halt ile mahâll-i mezkûrda vâki‘ gayrı ez-selhhâne-i mîrî on aded ganem selhhânelerinden ikinci selhhâne ve merbûtâtından dekâkîn-i ma‘lûmede kasablık ticâretinde Cenâb-ı Rezzâku’l-âlem hazretlerinin inâyet ve ihsânlarıyla hâsıl olan fâide ve üç buçuk hisse i‘tibârıyla bir buçuk hissesi benim ve bir hissesi merkūm Hüseyin Ağa’nın ve bir hissesi mezbûr Ahmed Ağa’nın olmak üzere mukāvele birle akd-i şirket-i inân eyledik dedikde mukırr-ı merkūm es-Seyyid el-Hâc Hasan Efendi’yi cemî‘ kelimât-ı meşrûhasında merkūmân Hüseyin ve Ahmed ağalardan her biri vicâhen tahkīk ve şifâhen tasdîk etmeleriyle vâki‘ hâli mevlânâ-yı mûmâ-ileyh mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu] Şuhûdü’l-hâl: Kethüdâ-i muhzırân Hafız İsmail Ağa, Serduhânî Mehmed Ağa, Muhzır Halil Çelebi.