İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 434 Hüküm no: 433 Orijinal metin no: [79b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeytinyağcı Emrullah Ağa’nın sabuncu dükkânı gediğindeki hissesini sabuncu esnafından Yordan ve Vasil’e sattığı Sabuncu Nüshateyn Mahmiye-i İstanbul’da Kantarcılar kurbünde Hoca Hamza mahallesinde sâkin Zeytyağcı es-Seyyid el-Hâc Emrullah Ağa b. es-Seyyid İbrahim meclis-i şer‘-i münîrde işbu bâ‘isiyyü’s-sifr Sabuncu Yordan v. Yorgi ve Vasil v. Nikoli nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Ayazma Kapısı dâhili ittisâlinde kâin beher mâh beşer guruş kirâ-i kadîmeli bir bâb sabuncu dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla doksan sehmi İsak ve Rafael nâm karındaş Yahûdilerin ve otuz sehmi dahi benim yedimizde bâ-hüccet-i şer‘iyye mülkümüz olmağla ben gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğum otuz sehm hisse-i mezkûremi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîklerim mersûmânın izinleriyle mesfûrân Yordan ve Vasil zimmîlere ale’l-iştirâk üç bin yüz guruşa bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i meşrûh iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr üç bin yüz guruşu müşteriyân-ı mersûmân yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda olan hisse-i mezkûremde benim aslâ ve kat‘â alâka ve medhalim kalmayıp mesfûrân Yordan ve Vasil zimmîlerin mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 28 Za sene 1247 Şuhûdü’l-hâl: Kethüdâ Mehmed Ağa, Hafız Mehmed Efendi, es-Seyyid Hasan Ağa, Yiğitbaşı Mehmed Ağa. Bratamos v. Tanaş, Sava v. Tanaş, Dimitri v. Nikoli.