İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 436 Hüküm no: 436 Orijinal metin no: [80a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nevşehirli Hüseyin Ağa’nın tütüncü dükkânı gediğini Aprasan Nasraniyeye sattığı Tütüncü Medîne-i Üsküdar’a muzâfe Kandilli karyesinde sâkin Nevşehirli es-Seyyid Hüseyin Ağa b. es-Seyyid Musa meclis-i şer‘-i münîrde işbu bâ‘isetü’s-sifr Aprasan? bt. Tamor Nasrâniyenin sadr-ı kebîr oğlu ve tarafından husûs-ı âtîde tasdîka vekîl-i şer‘îsi Tütüncü Mikail v. Agop nâm zimmî muvâcehesinde ikrâr-ı tâm ve takrîr-i kelâm edip İstanbul’da Yerebatan Sarayı karşısında tarafeyni tarîk-i âm ile mahdûd köşebaşında kâin Ma‘den kaleminde Mosi ismine mukayyed ve mu‘teber bir bâb tütüncü dükkânı derûnunda mevcûde beyne’l-esnâf gedik ta‘bîr olunur iki peşkûn ve on bir billûr kâse ve üç hûni ve iki terâzî ma‘a derâhim ve bir kantar ve sâir âlât-ı lâzıme-i ma‘lûme akd-i âti’z-zikrin sudûruna değin müstakıllen yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mersûme Aprasan? Nasrâniyeye iki bin üç yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin üç yüz guruşu bana tamâmen def‘ ü teslîm ve ben dahi yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteriye-i müvekkile-i mersûme Aprasan? Nasrâniyenin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 16 Zilhicceti’ş-şerîfe sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yiğitbaşı Ahmed Ağa, Yazıcı Mehmed Efendi.