İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 437 Hüküm no: 437 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in tütüncü dükkânı gediğini Tütüncü Nikagos’a sattığı Tütüncü Mahrûse-i Galata’ya muzâfe Beşiktaş nâhiyesine tâbi‘ Dolmabahçe nâm mahâlde sâkin Enderûn-ı hümâyûn’dan muhrec el-Hâc Mustafa Bey b. el-Hâc Abdullah meclis-i şer‘-i enverde tütüncü tâifesinden işbu bâ‘isü’s-sifr Eğinli Nikagos v. Ohannes nâm zimmî muvâcehesinde ikrâr-ı tâm ve takrîr-i kelâm edip İstanbul’da Ayasofya-yı Kebîr kurbünde Arslanhâne sırasında medrese ittisâlinde kâin Ma‘den kaleminde Markos zimmî ismine mukayyed ve mu‘teber şehriye beş guruş kirâ-i kadîmeli bir bâb tütüncü dükkânı derûnunda mevcûde beyne’l-esnâf gedik ta‘bîr olunur bir peşkûn ve beş billûr kâse ve iki hûni ve iki terâzî ma‘a derâhim ve bir kantar ve sâir âlât-ı lâzıme-i ma‘lûme akd-i âti’z-zikrin sudûruna değin müstakıllen yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Nikagos zimmîye bin beş yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d âlât-ı gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Nikegos zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 18 Z sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yiğitbaşı Hafız Ahmed Ağa, Yazıcı Mehmed Efendi.