İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 439 Hüküm no: 439 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Vasil ve Yani’nin Koska’daki bakkal dükkânı gediğindeki hisselerinin bir kısmını Bakkal Yakof’a sattıkları Koska’da bakkāl Âsitâne-i aliyye’de vâki‘ bakkāl tâifesinden Vasil v. Yani ve Yuvakim v. Lefter nâm zimmîlerden her biri meclis-i şer‘-i hatîrde tâife-i mersûmeden işbu hâmilü’s-sifr Yakof v. Yuvan nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Koska kurbünde Mimâr Kemaleddin mahallesinde şekerci dükkânı karşısında vâki‘ Aynalı Hacı Abdi dükkânı denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Muhallefât halîfesi halîlesinin ve otuzar sehmden altmış sehmi akd-i âti’z-zikrin sudûruna değin bizim yedimizde mülkümüz olmağla biz gedik-i mezkûrdan ber-minvâl-i muharrer mâlik olduğumuz otuz sehm hissemizin yirmişer sehmini yedimizde ibkā mâ‘adâ onar sehmden yirmi sehmini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide <> ve şerîkimiz merkūmenin izn ü icâzetiyle mersûm Yakof zimmîye bin beş yüz guruşa bey‘ ü temlîk ve vech-i lâyıkı üzere teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin beş yüz guruşu müşteri-i mersûm bize tamâmen def‘ ü teslîm ve biz dahi yedinden ahz u kabz ve bi-kadri’l-hısas beynimizde iktisâm etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda olan otuzar sehm hissemizin onar sehminde bizim aslâ ve kat‘â alâka ve medhalimiz kalmayıp mersûm Yakof zimmînin mülk-i müşterâsı ve hakk-ı sırfı olmuşdur dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 17 Rebî‘ülevvel sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı İsak, Ustabaşı Kiryako, Kabzımâl Sava, Yazıcı Hıristo.