İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 440 Hüküm no: 440 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki bakkalların sâbık kabzımalı Sava’nın bakkal ve tüccarlardaki alacaklarını tahsil etmek üzere Kabzımal Mercanlı Yani’yi vekil tayin ettiği Bakkālânın kabzımâl ile ibrâları Mahmiye-i İstanbul’da kâin bi’l-cümle bakkāl esnâfının hâlâ kabzımâlları olan Mercanlı Yani v. Dimo nâm zimmî esnâf-ı merkūme Pazarbaşısı Süleyman Ağa ve Bölükbaşısı Molla Abdi ve sâir mazbûtü’l-esâmî nüzzâr ve tüccâr ile bakkāl esnâfının hâlâ nizâm ustalarından Şehzâdebaşılı İstefan v. Bratamos ve Çarşambapazarlı İsak v. Kiryako ve Fenerli Ananosti v. Hıristo ve Paşakapılı Dimitri v. Yani ve İncirdibli Yani v. Kosti ve Yağcılar ustabaşısı Balıkpazarlı Zahari v. Yorgi ve Bahçekapılı Nikola v. Yani ve Gümrükönülü Kostandi v. Ananosti ve Samatyalı Kostandi v. İspir[o] ve Kadırga Limanlı Mai v. Anaştaş ve Kıbleçeşmeli Nikoli v. Bratamos ve Yokuşbaşılı Yuvan v. İstirati nâm zimmîler hâzır oldukları hâlde meclis-i şer‘-i hatîrde esnâf-ı merkūmenin kabzımâlları olup bu def‘a nizâm ustası ta‘yîn olunan Sarıgezli [Sarıgörezli] Sava v. Anaştaş nâm zimmî muvâcehesinde hâzırûn-ı mersûmûnun tasdîkleriyle ikrâr-ı tâm ve takrîr-i kelâm edip mersûm Sava zimmînin esnâfımıza kabzımâl olduğu müddetde esnâf-ı merkūmenin emirleriyle bi’l-cümle makbûz ve masrûfunun hesâbını hâzırûn-ı mersûmûn ve sâir esnâfımız ma‘rifetleriyle sahîhan rü’yet eylediğimizde mersûm Sava zimmînin yed ü zimmetinde tüccârın gayrı esnâfımızın bir akçe ve bir habbe alacağımız zâhir olmayıp ancak mesfûr Sava zimmînin kabzımâl olduğu müddetde bi’l-cümle esnâfımızın emirleriyle umûr-ı lâzımelerine masârıfından esnâfımız üzerlerinde zuhûr edip makbûlümüz olan kırk dört bin iki yüz otuz beş guruş alacak hakkını mersûm Sava zimmî esnâfımızdan cem‘ ü tahsîl ve kendiye teslîme tarafından beni tevkîl ve ihâle eylediğinde ben dahi ba‘de’l-kabûl meblağ-ı mezkûru ber-vech-i muharrer esnâf-ı mezkûreden cem‘ ü tahsîl ve kendiye teslîme ta‘ahhüd eyledim dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu] Fî-gurreti Z sene 1247 Şuhûdü’l-hâl: Eş-şâhidûnü’s-sâbikūn.