İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 468 Hüküm no: 470 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevkufat kâtiplerinden Mehmed Arif Efendi’nin zeytinyağı mağazasında miras yoluyla yedi hissesi olduğuna dair hüccet verilmesi Hülâsa kaydı ihrâc-şüd Fî 13 Receb sene [1]320 [Mühür] (…) Zeytyağcı mağazası ihbârı Kaydı ihrâc-şüd Fî 29 Şa‘bân sene [1]317 [Mühür] (…) Kaydı ihrâc-şüd Fî 14 Receb sene [1]329 [Mühür] (…) Mahmiye-i İstanbul hısnı ebvâbından Cibâli Kapısı dâhilinde Üskübî mahallesinde sâkin iken bundan akdem vefât eden Mısr-ı Kâhire kuzâtından es-Seyyid el-Hâc Mehmed Tahir Efendi b. İsmail’in verâseti zevce-i menkûha-i metrûkesi Hadice Hatun bt. el-Hâc Abdurrahman ile sulbî kebîr oğlu Mevkūfât kalemi ketebesinden es-Seyyid Mehmed Ârif Efendi’ye münhasıra ve mesele-i mîrâsları sekiz sehmden olup sihâm-ı mezbûreden bir sehmi zevce-i mezbûreye ve yedi sehmi ibn-i merkūma isâbeti tahakkukundan sonra vârisân-ı mezbûrândan ibn-i merkūm es-Seyyid Mehmed Ârif Efendi meclis-i şer‘-i münîrde bi’l-verâse takrîr-i kelâm ve bast ani’l-merâm edip mahmiye-i mezbûre hısnı ebvâbından Bâb-ı Caferiye hâricinde Sebzehâne kurbünde Sarrâf sûkunda vâki‘ Muytab Mustafa Ağa ve Yemişçi Süleyman Ağa mağazaları beynlerinde kâin Şa‘riyeci mağazası denmekle arîf bir bâb zeytyağcı mağazası derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme babam ve mûrisimiz müteveffâ-yı mezbûrun hayatında bâ-hüccet-i şer‘iyye yedinde mülkü olup ba‘de vefâtihî benimle zevce-i mezbûre Hadice Hatun’a ber-tashîh-i mezkûr mevrûs olmağla husûs-ı mezkûre vukūf-ı tâmları olan kimesnelerden istihbâr olunup yedime bir kıt‘a hüccet i‘tâsı matlûbumdur dedikde fi’l-hakīka gedik-i mezkûr merkūm es-Seyyid Mehmed Ârif Efendi’nin babası müteveffâ-yı mezbûr es-Seyyid el-Hâc Mehmed Tahir Efendi’nin hayatında yedinde mülkü olup ba‘de vefâtihî oğlu merkūm ile zevcesi mezbûre Hadice Hatun’a mevrûs olduğunu zeyl-i vesîkada muharrerü’l-esâmî Müslimîn kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka ketb olundu. Fî 29 Ra sene 1247 Şuhûdü’l-hâl: Muhzır Hüseyin Çelebi b. Yusuf, Yemenîci Abdülkadir Ağa b. Ali, Ketebeden es-Seyyid Süleyman Efendi b. Ahmed, İmâm es-Seyyid Ali Efendi b. Ahmed, İmâm Ömer Efendi b. Veliyyüddin.