İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 467 Hüküm no: 469 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani’nın üç adet bakkal dükkânı gediklerindeki hisselerini Bakkallar Ustabaşısı Ananosti’ye sattığı Bakkāl Kumkapı’da Damgacı ve Mehmed Çelebi ve Kızlar ağası dükkânları Vilâyet-i Rumeli’de Yenişehir-i Fener kazâsına muzâfe Ağrafe nâhiyesine tâbi‘ Mavril karyesinde mütemekkin Yani v. Dimitri v. Yani nâm zimmî tarafından husûs-ı âti’l-beyânda vekîl olduğu Bakkāl Dimitri v. Nikola ve diğer Dimitri v. Yani nâm zimmîler şehâdetleriyle sâbit olan başka Yani v. Kosta nâm zimmî meclis-i şer‘-i hatîrde bakkāl tâifesinin ustabaşılarından işbu hâmilü’r-rakīm Ananosti v. Hıristo nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Kumkapı dâhilinde kâin Damgacı dükkânı denmekle şehîr bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz iki sehm bir pul hissesi mersûm Ananosti zimmînin ve yetmiş dört sehm bir pul hissesi Kostandi ve Zahari ve Yorgi evlâd-ı Yani zimmîlerin iştirâken ve bâkī on üç buçuk sehmi ile bâb-ı mezkûr hâricinde kâin Mehmed Çelebi dükkânı denmekle arîf bir bâb ve Kızlarağası dükkânı denmekle ma‘rûf bir bâb ki cem‘an iki bâb bakkāl dükkânı derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmelerin yüz yirmişer sehm i‘tibârıyla otuz dokuzar buçuk sehmi mersûm Ananosti zimmînin ve otuzar sehmi Yani v. Tanaş zimmînin ve otuzar sehmi Dimo v. Yorgi zimmînin ve on altışar buçuk sehmi Yani ve Yorgi veledey Dimitri zimmîlerin ve mâ‘adâ dörder sehmi dahi müvekkilim mersûmun akd-i âti’z-zikrin sudûruna değin bâ-hüccet-i şer‘iyye yedlerinde mülkleri olmağla gedikhâ-i mezkûrelerden mârru’z-zikr Damgacıbaşı dükkânı gediğinden on üç buçuk sehmi ile zikirleri mürûr eden Mehmed Çelebi ve Kızlarağası dükkânlarından dörder sehm hisselerini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Ananosti zimmîye bin iki yüz guruşa bi’l-vekâle bey‘ ve her birini lâyıkı vechile teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl ve semen-i mezkûr bin iki yüz guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle İbrahim (ibrâ) ve iskāt eyledik ba‘de’l-yevm hisse-i gedikhâ-i mezkûrelerde müvekkilim mersûmun aslâ ve kat‘â alâka ve medhali kalmayıp müşteri-i mersûm Ananosti zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 14 Rebî‘ülâhir sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı İsak, Yazıcı Dimitri, Kabzımâl Yani.