İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 470 Hüküm no: 472 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rikâb-ı hümayun çavuşlarından Mehmed Emin Ağa’nın zeytinyağı mağazasında miras yoluyla yedi hissesi olduğuna dair hüccet verilmesi Zeytyağcı ihbârı Mahmiye-i İstanbul’da Haydar[paşa] kurbünde el-Hâc Ferhad mahallesinde sâkin iken bundan akdem vefât eden kuzâtdan es-Seyyid Ahmed Reşid Efendi b. Mehmed Necib b. Abdullah’ın verâseti zevce-i menkûha-i metrûkesi Fâtıma Hatun bt. el-Hâc Abdurrahman ile sulbî kebîr oğlu hademe-i rikâb-ı hümâyûn çavuşlarından es-Seyyid Mehmed Emin Ağa’ya münhasıra ve mesele-i mîrâsları sekiz sehmden olup sihâm-ı mezbûreden bir sehmi zevce-i mezbûreye ve yedi sehmi <> ibn-i merkūma isâbeti tahakkukundan sonra vârisân-ı merkūmândan ibn-i merkūm es-Seyyid Mehmed Emin Ağa meclis-i şer‘-i şerîf-i enverde bi’l-verâse takrîr-i kelâm edip mahmiye-i mezbûre hısnı ebvâbından Bâb-ı Caferiye hâricinde Sebzehâne kurbünde Sarrâf sûkunda vâki‘ Felekoğlu el-Hâc İbrahim Ağa ve Üsküdarî Muytab Mustafa Ağa mağazaları beyninde kâin bir bâb zeytyağcı mağazası derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme babam ve mûrisimiz müteveffâ-yı mezbûrun hayatında bâ-hüccet-i şer‘iyye yedinde mülkü olup ba‘de vefâtihî benimle zevcesi merkūme Fâtıma Hatun’a ber-tashîh-i mezkûr mevrûs olmağla husûs-ı mezkûre vukūf-ı tâmları olan kimesnelerden istihbâr olunup yedime bir kıt‘a hüccet i‘tâsı matlûbumdur dedikde fi’l-hakīka gedik-i mezkûr merkūm es-Seyyid Mehmed Emin Ağa’nın babası müteveffâ-yı mezbûr es-Seyyid Ahmed Reşid Efendi’nin hayatında yedinde mülkü olup ba‘de vefâtihî oğlu merkūm ile zevcesi mezbûre Fâtıma Hatun’a mevrûs olduğunu zeyl-i vesîkada muharrerü’l-esâmî Müslimîn kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka ketb olundu. Fî 29 Rebî‘ülevvel sene 1247 Şuhûdü’l-hâl: Eş-şâhidûnü’s-sâbikūn.