İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 470 Hüküm no: 473 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firar eden Tütüncü Lazoğlu Kara Lambo’nun satılıp bedelinin yed-i emine teslim edilen dükkânındaki eşyaların listesi Defter-i mefkūd Tütüncü İstanbul’da Kalpakçılarbaşı’nda Yolgeçen hanı ittisâlinde kâin bir bâb tütüncü dükkânında müşâhereten müstecir olan Tütüncü Erzurumlu Lazoğlu Kara Lambo zimmî şehr-i sâbık Zilka‘detü’ş-şerîfesi evâhirinde dükkân-ı mezkûru mukaffelen terk ve ta‘tîl birle diyâr-ı âhara firâr ve gaybet-i münkatı‘a ile gāib ve mefkūd olmağla dükkân-ı mezkûr ma‘rifet-i şer‘le küşâd ve derûnunda zuhûr edip mütesâri‘ü’l-fesâd olan eşyâsı tahrîr ve semen-i misilleriyle âhara bey‘ olunup esmânı mefkūd-ı mersûmun hâli mütebeyyin oluncaya değin yed-i emîne vaz‘ olunup dükkân-ı mezkûr derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûme kendiye teslîm olunmasını âlât-ı gedik-i mezkûrun müstakıllen mâliki hâlâ Reisler Kethüdâsı İbrahim Ağa b. Abdi bâ-arzuhâl istid‘â etmekle ol bâbda sâdır olan fermân-ı âlîlerine imtisâlen savb-ı şer‘-i enverden irsâl olunan Kâtib es-Seyyid Hüseyin Rıza Efendi ve ma‘an meb‘ûs ümenâ-i şer‘den Çukadâr Mehmed Ağa b. Hasan ve Muhzır Bandırmalı Hüseyin Çelebi b. Osman ile dükkân-ı mezkûra varıp esnâf-ı mezkûrenin kethüdâ vekîli es-Seyyid Mehmed Ağa b. Halil ve Yiğitbaşı Hafız Ahmed Ağa b. Halil ve Gedikpaşa köşe ustası Ahmed Aziz Efendi b. el-Hâc Mehmed Emin nâm kimesneler ile dükkân-ı mezkûrun kuflü feth ü küşâd ve derûnunda mevcûde olmağla mefkūd-ı mesfûrun hâli mütebeyyin oluncaya değin hıfza emîn ve mu‘temed ve müstakīm idiği bi’l-ihbâr zâhir olup kıbel-i şer‘den kayyım nasb olunan duhân tüccârından es-Seyyid Hasan Efendi b. el-Hâc Hüseyin nâm kimesnenin ma‘rifeti ve ma‘rifet-i şer‘le bey‘ olunan eşyânın defteridir ki ber-vech-i âtî zikr olunur. Fi’l-yevmi’s-sâbi‘ aşer min-Zilhicceti’ş-şerîfe li-sene seb‘a ve erba‘în ve mi’eteyn ve elf. Duhân-ı kenevir boğça 6 aded, fî 120 para 30 kıyye 90 guruş Duhân-ı Bafra 128 kıyye, fî 110 para 352 guruş Duhân-ı Pürsıçan 45 kıyye, fî 100 para 112,5 guruş Duhân-ı Pedriç 119 kıyye, fî 60 para 178,5 guruş Duhân-ı Demirli 50 kıyye, fî 80 para 100 guruş Kıyılmış ve bir mikdâr perâkende duhân 15 kıyye, fî 60 para 15 guruş Duhân havanı ve satır ve bir aded sitil-i yemenî? 32 guruş Cem‘an yekûn Guruş Yalnız sekiz yüz seksen guruşdur 880 Dellâliye ve kantariye 17,5 862,5 21,5 841 Sahhu’l-bâkī: 841 guruş. Yalnız sekiz yüz <> kırk bir guruşdur. Sahhu’l-bâkī-i merkūm sekiz yüz kırk bir guruş bir kutu derûnuna vaz‘ ve temhîr olunup kayyım-ı mezbûr es-Seyyid Hasan Efendi’nin izni ve Muhzır Molla Mustafa b. Hüseyin’in yediyle li-ecli’l-hıfz Sandal bezzâzistânına vaz‘ olunduğu işbu mahalle şerh verildi.